Një dozë nga një vaksinë, dhe një dozë nga vaksina tjetër. Kur në fillim të këtij viti Britania e Madhe tha se do t’i injektojë të njëjtit person 2 vaksina të ndryshme, në mungesë të alternativave të disponueshme, komuniteti shkencor pati mendime të kundërta.
U tha se mungonte një bazë eksperimentale, mbi të cilën të bazoheshin këto vendime. Për këtë arsye, shkencëtarët nga Universiteti i Oksfordit dhe task-forca e qeverisë britanike që merret me fushatën e vaksinimit, kanë zgjedhur që t’i japin një përgjigje konkrete kësaj pyetje.
Gjatë javëve të ardhshme, do të testohet efektiviteti i një regjimi të përzier vaksinimi, për të kuptuar nëse kombinimi i lloje të ndryshme është i sigurt dhe efektiv. Qëllimi është të kuptohet nëse sigurimi i dy dozave të vaksinave të ndryshme, siguron një mbrojtje ekuivalente me atë të dy dozave nga e njëjta vaksinë, më të ulët, apo edhe më të mirë, dhe mënyrën si kjo qasje “shqetësuese” mund të luftojë variantet e koronavirusit të përhapura në botë.
Nëse rezulton që vaksinat janë “të këmbyeshme”, një fleksibiliteti më i madh në fushatat e vaksinimit do të ketë pasoja në të gjithë botën, pikërisht në një kohë kur kalendari i vaksinimit varet shumë nga furnizimet me vaksina të dërguara nga kompanitë farmaceutike.
Studimet mbi modelet e kafshëve, tregojnë se kombinimi i një vaksine të bazuar mbi një adenovirus të dobësuar, siç është ajo e Oxford-AstraZeneca, dhe një vaksinë me mARN, siç është ajo e Pfizer-BioNTech, mund të sjellë një përgjigje imune më të fuqishme. Pra është e nevojshme të kuptohet nëse e njëjta gjë vlen për njerëzit, dhe nëse kjo përkthehet në një mbrojtje më efektive.
Për studimin që quhet “COVID-19 Heterologous Prime Boost”,do të rekrutohen 820 persona mbi 50 vjeç që nuk kanë marrë ende ndonjë nga vaksinat anti-covid. Tek ata do të testohen 4 kombinime të ndryshme të 2 vaksinave të aprovuara në Mbretërinë e Bashkuar:një dozë e parë e vaksinës së Oxford-AstraZeneca, e pasuar nga një dozë vaksine e Pfizer-BioNTech; më pas një vakisinë e Pfizer, e ndjekur nga një e Oksfordit; që të dyja dozat e vaksinës Oxford apo që të dyja dozat e vaksinës Pfizer, në të dy grupet e kontrollit.
Që të gjitha këto kombinime do të testohen në dy afate të ndryshme kohore:pas 4 javësh, kur të mblidhen të dhëna të ndërmjetme, dhe pas 12 javësh. Në këtë mënyrë, do të merren më shumë të dhëna mbi mundësinë e distancimit të dozave dhe për pasojat e tyre në përgjigjen imune.
Studiuesit shpresojnë që kombinimi i vaksinave të ndryshme të japë një përgjigje imune “të zgjeruar”, me nivele më të larta të antitrupave për një kohë më të gjatë, dhe që diversifikimi i qasjes të ndihmojë në luftën kundër varianteve të reja të koronavirusit, të cilat mbartin mutacione proteina që veshin virusin nga jashtë.
Burimi i lajmit: https://www.focus.it/scienza/salute/vaccini-anti-covid-test-regime-misto
Përshtatur nga TIRANA TODAY
