Vitamina D është një nga më të përfolurat e këtij viti, teksa studimet e kohëve të fundit e kanë theksuar rolin e saj kryesor në forcimin e sistemit tonë imunitar. Ndërkohë ka studime që tregojnë se ajo mund të ndihmojë për të parandaluar prekjen nga Covid-19.
Një nga studimet më të cituara nga mediat së fundmi, është ai i Universitetit të Bostonit, që zbuloi se njerëzit që kanë mungesë të vitaminës D, kanë 54 për qind më shumë mundësi të preken nga koronavirusi i ri.
Pacientët më të moshuar se 40 vjeç, që kishin nivele të mjaftueshme të vitaminës D, kishin më shumë se 51 për qind më pak të ngjarë që të vdisnin nga virusi. Edhe pse duhen më shumë studime para se të arrihet në një përfundim shterues, ajo që dimë është se vitamina D është e mirë për shëndetin imunitar në përgjithësi.
Dhe kjo është veçanërisht e rëndësishme të kihet parasysh gjatë bllokimit për shkak të pandemisë. Për shumicën e njerëzve, vitamina D është e lidhur me diellin. Por për shkak të natyrës së bllokimit, dhe ardhjes së dimrit, ne po kalojmë shumë më tepër kohë në ambiente të mbyllura se sa normalisht.
Prandaj provoni të bëni çdo ditë një shëtitje në kohën e drekës, apo gjatë kohës së dritës ditore, sa herë që është e mundur. Vitamina D është e njohur për rolin e saj jetik mbi nyjet dhe shëndetin e muskujve. Por ky mund të jetë vetëm fillimi i përfitimeve të saj shëndetësore. Kjo vitaminë është gjithashtu thelbësore për të ruajtur në gjendje të mirë pune sistemet imunitare të njerëzve.
Burimi kryesor (90 për qind) i furnizimit tonë me vitaminë D, është përmes rrezeve të diellit në lëkurë. Ne e marrim në sasi të mëdha këtë vitaminë gjatë muajve të verës, ku ajo ruhet në mëlçi, dhe pastaj përdoret në stinët më të ftohta dhe me më pak diell.
Mungesa e vitaminës D mund të çojë në humbjen e dendësisë së kockave, gjë që mund të sjellë sëmundjen e osteoporozës dhe fraktura të ndryshme. Në raste të rënda por të rralla, mungesa e kësaj vitamine mund të çojë në deformime të kockave, të tilla si rakitizmi dhe dhimbje kockash, ose zbutje të shkaktuara nga një gjendje e quajtur osteomalacia.
Më të rrezikuarit nga mungesa e kësaj vitamine janë të moshuarit, gratë shtatzëna, ata që vuajnë nga diabeti dhe ata që janë mbipeshë.
Studimet kanë zbuluar se popullata BAME (e zezë, aziatike dhe ajo etnike e pakicave) ka më shumë të ngjarë të ketë nivele më të ulëta, pasi lëkura e errët prodhon shumë më pak vitaminë D sesa lëkura më e çelët.
Disa nga simptomat që tregojnë një mungesë të mundshme të vitaminës D janë ndjenja e lodhjes, dhimbjet në kocka dhe shpinë, pasi vitamina D ndihmon në përthithjen e kalciumit,
Depresioni, sëmurja e shpeshtë. Po si ta rrisni nivelin e vitaminës D në trupin tuaj?
Ekspertët rekomandojnë një dietë të pasur me peshk të yndyrshëm dhe prodhime deti, kërpudha, të verdhën e vezës, qumështin, lëngun e portokallit dhe drithërat, si dhe mishin e kuq.
Sigurisht më e rëndësishmja është ekspozimi ndaj rrezeve të diellit. Por duhet të keni kujdes me përdorimin e kremrave. Studimet klinike kanë hedhur poshtë disa spekulime se përdorimi i përditshëm i kremrave ndaj diellit çon në pamjaftueshmëri të vitaminës D.
Pavarësisht sesa krem përdorni, ose sa e lartë është SPF-ja, disa nga rrezet ultravjollcë arrijnë sërish në lëkurën tuaj. Përveç dietës dhe ekspozimit në rrezet e diellit, suplementet shtesë kanë qenë temë diskutimi muajt e fundit.
Më mars të këtij viti, Instituti i Shëndetit Publik në Angli, rekomandoi që grupet më të rrezikuara duhet të marrin 10 mikrogramë vitaminë D çdo ditë, për të përballuar efektet negative të bllokimit. Sipas ekspertëve, kufiri maksimal i dozës ditore është 75 mikrogramë.
Burimi i lajmit: https://www.healthista.com/can-vitamin-d-help-fight-covid-19-heres-what-you-need-to-know/
Përshtatur nga TIRANA TODAY
