Shqiptarët janë në pritje të një zgjidhje amerikane për krizën, pasi njihet fuqia e tyre dhe efektiviteti i ndërhyrjes. Sot në Tiranë do të duken ndoshta shenjat e para, pas takimeve që do të bëjë Zv.ndihmës-sekretari i Shtetit për Europën, Matthew Palmer, i cili gjendet në një tur ballkanik. Përpos mesazheve, SHBA e di mjaft mirë se Shqipëria është në krizë.
Takimin e parë, zyrtari amerikan do e ketë me kryeministrin Rama të hënën, të martën pritet të takohet me presidentin Meta. Në të njëjtën ditë, Palmer do zhvillojë takim me kryedemokratin Lulzim Basha dhe kryetaren e LSI-së, Monika Kryemadhi.
Nga ana tjetër, ambasadori i BE në Tiranë, Luigi Soreca ka apeluar ndaj qeverisë dhe opozitës që të gjejnë gjuhën e përbashkët dhe të bëjnë kompromis.
“Ne (BE) kemi qenë të parët që kemi bërë ftesa për thirrje për dialog. Vazhdojmë ta bëjmë këtë gjë në çdo moment, dhe në çdo takim. Është momenti për kompromis. Kompromisi do të thotë që qeveria dhe opozita takohen në mesin e urës. Unë mendoj se ura ekziston, thjesht duhet gjetur”, shprehet Soreca.
Përsa i përket reformës zgjedhore, ambasadori ka nënvizuar domosdoshmërinë për marrjen e masave në respekt të zbatimit të rekomandimeve të OSBE-ODIHR.
“Reforma zgjedhore mund të kryhet me ndryshime legjislative, por edhe me hapa që ndërmerren nga ana e qeverisë, e kemi ftuar qeverinë të marrë masa, p.sh për shitblerjen e votave. Kur them që ka disa gjëra që mund të bëhen nga Qeveria në këtë fushë, dhe këto janë gjërat që opozita i ka kërkuar, ka të bëjë me rekomandimet e OSBE-ODIHR, disa kërkojnë ndryshime legjislative dhe të tjera ndërhyrje nga qeveria”, përfundoi ai.
Sot, në mbledhjen e grupit të Partisë Demokratike, lideri i opozitës ka premtuar sërish rrëzimin e kryeministrit Edi Rama përmes protestës së 13 Prillit.
Basha siguron se ka mbështetje të madhe popullore, dhe se protesta e radhës do të sjellë shpresë për vendin. “Për protestën e 13 Prillit, duhet një organizim kapilar për ta patur pjesëmarrjen edhe më të madhe se në dy protestat e tjera kombëtare.
Kemi të gjithë situatën në favor, ne jemi de fakto shumicë. Që pas djegies së mandateve, PD ka një rritje të menjëhershme edhe mes të pavendosurve. Jemi shumicë absolute në çdo sondazh të pavarur vendas dhe të huaj.
Duhet ta përkthejmë sa më shpejt në votë këtë mbështetje të shqiptarëve. Për këtë arsye, pjesëmarrja e lartë në protestë ka një rëndësi të jashtëzakonshme. Kërkesa jonë mbetet e pandryshueshme, largimi i Edi Ramës dhe qeveria tranzitore. Të shpjegojmë kudo në çdo takim që ne jemi shumicë, dhe duhet ta tregojmë këtë”.
