“A i njeh këta dy bosët?”

Pasi dorëzuan kupën e kampionatit të mërkurën në Korçë në duart e Skënderbeut kampion, Armando Duka dhe sekretari Ilir Shulku janë fotografuar në lokal. Deputeti i Partisë Socialiste, Erion Braçe, me anë të një postimi në Instagram ka ironizuar sërish presidentin e Federatës Shqiptare të Futbollit, duke i kujtuar çakmakun në ndeshjen Partizani-Skënderbeu. Braçe i bën me dije Ministres së Shëndetësisë, se Armand Duka së bashku me Ilir Shulkun janë duke shkelur ligjin e duhanit.POSTIMI I BRAÇES: KUSH MA KA ÇAKMAKUN? (Extra Time)
E nderuara Ministre!
A i njeh këta dy bosët? Po i identifikoj se nuk dua t’u marr kohë;
Janë Armando Duka-ky djathtas, ish presidenti Federatës Shqiptare të Futbollit por që e mban ende këtë post, Ilir Shulku-ky majtas, sekretari i këtij në detyrë.
Po pinë duhan në një ambient publik, të mbyllur!
Shiheni pak, nuk janë as nga këto cigaret e holla por nga këto rrotullat e mëdha që ju zënë gjithë gojën e ndotin gati një sallon të tërë me tym të rëndë!
E nderuar Ministre!
Unë di që është ende në fuqi ligji “Për mbrojtjen e shëndetit nga produktet e Duhanit”, Ligj me ndalesat e posaçme për këtë lloj zyrtarësh e jo vetëm, shumë më gjerë se kaq!
Përse nuk zbatohet ligji për këtë e nderuar Ministre? Si ka mundësi që ky, ka fituar një status paprekshmërie në raport me ligjin e që i ka dhënë  të drejtën ta shkelë kurdo e sido?
As që e çoj në mendje që ky dhe institucioni që ka drejtuar e bën sikur e drejton, të jetë shembull e model në betejën e shëndetshme kundër duhanit.
Por refuzoj të pranoj që ky të rrëmbejë një imunitet ndaj ligjit!Duhet të zbatohet ligji për këtë, e nderuar Ministre!
E di, këtë punë nuk e bën dot zyrtar më zyrtar, një inspektoriat i kufizuar në burime njerëzore e logjistike. Ashtu siç e di fare mirë se ligji ngarkon edhe institucionet e tjera për të zbatuar këtë ligj.
Por, t’u them të drejtën,  jam shumë i bindur se askush tjetër veç jush, nuk i afrohet t’i tregojë ligjin këtij tipi.
Bëjeni ju!
Bëjeni të paguajë siç ligji thotë!
Pra bëjeni një herë të vetme këtë që të kuptojë se duhet të zbatojë ligjin, që nuk është mbi ligjin, që nuk e refuzon dot ligjin!
VO: Shpresoj shumë që ky, të mos e ketë ndezur rrotullën që mban në gojë me çakmakun tim!!