Më 18 shtatorin e vitit 1970, rokeri i famshëm amerikan Jimi Hendrix ndërroi jetë në një spital të Londrës. Një natë më parë, kishte konsumuar alkool dhe disa pilula për gjumë. E fejuara e tij, Monika Daneman, shfaqi dyshime për shkakun e vdekjes së 27-vjeçarit. Por u këshillua nga policia të mos thoshte asgjë në publik.
Zyrtarisht u tha se Hendrix kishte vdekur i asfiksuar nga të vjellat e shkaktuara, nga sasia e madhe e qetësuesve të konsumuar. Por shumë njerëz dyshuan dhe ende dyshojnë se vdekja e tij, ishte në fakt një vrasje e organizuar nga CIA, në bashkëpunim me shërbimin sekret britanik. Pas famës së arritur në vitet 1960, Hendrix u bë një aktivist i njohur i lëvizjes kundër Luftës në Vietnam dhe i grupimit radikal afro-amerikan “Pantera e Zezë”.
Uashingtoni i druhej shumë ndikimit që kishte Hendrix tek shumë të rinj amerikanë. Konspiracionistët thonë se para vrasjes CIA kishte rekrutuar menaxherin e Hendrix, Mike Jeffery, për ta sabotuar në maksimum karrierën e atij që cilësohet ende si kitaristi më i madh i të gjitha kohërave.
Një tezë tjetër, është se Jeffery e vrau kitaristin për t’i marrë paratë e siguracionit të jetës. Në vitin 2009 dr.Banister, mjeku anglez që kreu autopsinë, e pranoi mundësinë që Hendrix të jetë vrarë.
Përshtatur nga Tirana Today
