Bursat e gjithë botës pësuan rritje të hënën, pas lajmit të kompanisë “Pfizer”, se vaksina e saj e mundshme anti-Covid, është 90 për qind efektive. Por ekspertët e fushës janë më të kujdesshëm.
Ata thonë se të gjithëve na pret një dimër i vështirë. Vala e dytë, pritet të jetë shumë më e rëndë se ajo e fillimit të pranverës. Edhe nëse vaksina nis të shpërndahet në fillim të vitit që vjen, dozat e prodhuara do jenë në fillim vetëm disa dhjetëra milionë. Ndërsa bota sot ka mbi 7.8 miliardë njerëz.
Edhe në skenarin më të mirë, llogaritet që 2-3 miliardë njerëz të mbeten të pambrojtur deri në fund të vitit të ardhshëm. Vaksina e “Pfizer” duhet të ruhet në temperaturën -80 gradë celcius. Kapacitete të tilla, i zotërojnë vetëm disa laboratorë të specializuar.
Vendet në zhvillim dhe ato të varfra, presin që të marrin vaksinat më të lira në treg, që po ofrohen nga Rusia dhe Kina. Efektiviteti i tyre është vënë në dyshim nga OBSH. Të gjitha këta faktorë, pritet që ta zgjasin me të paktën 1 vit pandeminë aktuale.
TIRANA TODAY
