Kreu i Partisë Demokratike, Sali Berisha, ka dhënë më shumë detaje për mediat përsa i përket protestës që do të mbajë kjo forcë më 7 korrik. Berisha është shprehur se protesta do të mbahet në orën 19:00 në Tiranë, dhe do të jetë e hapur për të gjithë shqiptarët. I pyetur nëse LSI-ja do t’i bashkohet protestës, Berisha la të nënkuptuar se kjo është një protestë e të gjithë shqiptarëve.
“Sirenat e alarmit për Shqipërinë në rrezik po bien në të katër anët e vendit. Mbrëmë në një tryezë, mendoj se kryefjala e asaj tyreze të jashtëzakonshme, të paparë ndonjëherë, ishte një dhe vetëm një protestë, protestë dhe vetëm protestë. Qytetarët shqiptarë duke filluar nga interesi i tyre kombëtar, shëndeti, vendi i punës, ndjejnë se janë në rrezik të madh. Ndjejnë një thirrje të brendshme se duhet t’i dalin zot vetes, dhe të marrin në dorë fatin e tyre. Kjo protestë është e hapur për të gjithë shqiptarët dhe është më 7 korrik në orën 7 të darkës, në Tiranë në rrugën dhe sheshin e saj më të madh. Para shqiptarëve në radhë të parë dhe do të protestohet ndaj qeverisë, parlamentit. Me vendosjen e monizmit, kushtetueshmëria e kësaj qeverie ka rënë. Një grup ekspertësh po punojnë për stemën. Ajo do të vendoset sepse ju e patë se u krijua, lindi dhe buroi një kualicion i paparë në shoqërinë civile. Me drejtuesit e lartë të PD është konsultuar protesta, por data i është lënë nderi shoqërisë civile. Kjo është një protestë e PD, shoqërisë civile. Duhej që data të gjente një miratim të plotë. Rama nuk është larguar, por Rama do të largohet”.
