Lidhur me zërat që qarkullojnë së fundmi për shpërndarjen e Parlamentit, nisur edhe nga kërkesat e dërguara në KQZ për numrin e deputetëve aktualë dhe shpërndarjen e tyre në zonat elektorale, presidenti Meta foli për reflektim. Ndër të tjera, ai tha se do të veprojë me shumë përgjegjshmëri.
“Presidenti i Republikës do të bëjë shumë veprime me shumë qetësi dhe përgjegjësi për mbrojtjen e Kushtetutës dhe vendit. Veprimet do të jenë në vijim. Duhet të themi se pa zgjedhje sipas standardeve, nuk ka negociata”, u shpreh ai.
Po kështu, kreu i shtetit i mëshoi fort faktit se Shqipëria ka vetëm një institucion që vendos për zgjedhjet, dhe ky është Presidenti i Republikës.
“Presidenti është i duruar që të gjithë të kuptojnë se pluralizmi ka tre dekada që ka ardhur në Shqipëri. Ua kam thënë dhe do t’ju them edhe një gjë, që nuk ua kanë thënë ndërkombëtarët. Pa zgjedhje gjithëpërfshirëse e me standarde më të mira se ato të kaluara, nuk ka çelje negociatash. Më besoni jam esëll gjatë gjithë ditës, jo më në mëngjes”.
