Kryeministri Edi Rama nuk i heq asnjë presje raportit të Komisionit të Venecias për anulimin e zgjedhjeve të 30 qershorit nga ana e presidentit Ilir Meta.
I pyetur nëse kreu i shtetit do të shkarkohet, teksa ishte i ftuar këtë të enjte në “Real Story”, kryeministri deklaroi se raporti i “Venecias” e quajti antikushtetues veprimin e Metës. Sipas tij, tashmë është në dorën e institucioneve shqiptare të vendosin nëse akti i ndërmarrë ishte i rëndë a i lehtë.
“Unë besoj që më shqip se më shqip se ka folur Komisioni i Venecias nuk ka folur askush. Duke qenë se situata e polarizuar dhe marrja e të gjitha bashkive mund të krijonte idenë se ne po përdornim forcën e pushtetit për të bërë një veprim që mund të ishte i diskutueshëm iu drejtuam Venecias.
Ajo e ka bërë të qartë që është shkelje e Kushtetutës. Pastaj sa e rëndë dhe sa e lehtë e vendosin institucionet shqiptare.
Nuk dëshiroj të konsumoj kohën e çmuar për të komunikuar me audiencën tuaj për një problematikë që është bërë e lodhshme për publikun. Të gjitha aspektet që lidhen me procesin janë në duart e komisionit të posaçëm dhe janë ata që do të dalin me një raport.
Të rrimë të merremi me Ilir Metën ndërkohë që ka kaq shumë gjëra për të thënë. E vërteta është që Shqipëria pati një goditje të rëndë që krijoi një kornizë të shtrembër për Shqipërinë dhe sigurisht e plagosi vendin, nuk diskutohet. Flasim për një proces rikuperimi ku ka shumë e shumë gjëra për të bërë dhe adresuar. Ilir Meta ka shkelur kushtetutën. A shkarkohet dhe a nuk shkarkohet këtë e përcakton procesi. Unë e kam thënë që në fillim se e ka shkelur Kushtetutën”, theksoi Rama.
