Opozita e bashkuar nuk ka ndërmend që të ndalet nga aksioni i tyre, për ti dhënë fund bandave kriminale në vend. Pak pas mbledhjes së opozitës në Elbasan, kreu i grupit parlamentar të LSI-së, Petrit Vasili, pohoi se të gjithë aleatët nuk do të tërhiqen.
Po kështu ai vendosi pikat mbi “i”, duke i mëshuar faktit se opozita ka krijuar platformën kundër krimit, që është edhe kryeçështja e shqetësimit të familjeve shqiptare, por edhe të kancelarive ndërkombëtare. Ai nuk hezitoi edhe të akuzojë kryeministrin Rama, duke thënë se po mban një pushtet të inkriminuar.
“Takimi lidhet me një fokus, siç është krimi, si krye çështje. Rama po mban në pushtet të inkriminuar. Është një shqetësim në familjet shqiptare, por edhe në kancelaritë ndërkombëtare.
Sot Shqipëria duhet pastruar njëherë e mirë nga ky fenomen shkatërrues. Sot opozita ka përpunuar edhe alternativën dhe qëndrimin e saj unik dhe të papajtueshëm me këtë çështje.
Për këtë problematik s’do të ketë hap pas dhe gjithçka që na ka thënë populli i Shkodrës, na e ka thënë edhe ai i Elbasanit. Në Parlament kemi qenë të pranishëm. Në momentin kur Parlamenti kalbëzohet, rrimë këtu dhe marrim atë që na thonë qytetarët. Kolegët e PD kanë paditur dje Ministrin e Brendshëm dhe policinë për bllokimin e komisionit hetimor për çështjen ‘Tahiri’. Ne do të vazhdojmë”, deklaroi Vasili.
