Kur studiuesit filluan të zhvillonin atë që ata shpresonin se do të ishte një vaksinë efektive ndaj COVID-19, ata tashmë e dinin se gripi H1N1 – një virus i ri si COVID-19 – prekte më rëndë pacientët mbipeshë apo obez. Pacientët me indeks të masës trupore 30 apo më shumë ishin më të rrezikuar që të shtroheshin në spital apo të humbnin jetën nga H1N1.
Kjo nuk është hera e parë që vërehet një lidhje e tillë. Një studim i vitit 2017 nga Universiteti i Karolinës së Veriut në Chapel Hill zbuloi se vaksina kundër gripit ishte më pak efektive tek pacientët që ishin mbi peshë apo obez. Ky studim përfshiu vetëm 1.022 pjesëmarrës, por edhe studime të tjera më të vogla tregojnë rezultate të ngjashme.
Kjo më parë se të krijohej vaksina kundër COVID-19, e testuar në më shumë se 40.000 pacientë dhe që tashmë po shpërndahet në të gjithë vendin. Të dhënat janë premtuese; të dy vaksinat e autorizuara ofrojnë më shumë se 90 për qind mbrojtje nga virusi.
Por mjekët dhe studiuesit janë të vetëdijshëm për gjetjet e H1N1 dhe UNC. Si një mjek i specializuar në mjekësinë e mbipeshës, unë jam një prej tyre. Tani të gjithë duam ta dimë: A do të jenë vaksinat e COVID-19 po aq efektive edhe tek pacientët që janë mbi peshë apo obez? Të dhënat fillestare tregojnë se ky është rasti për ta marrë këtë përgjigje, por të dhëna shtesë do të duhet të mblidhen pasi të vaksinohen shumë më tepër pacientë.
Përgjigja për këtë pyetje është thelbësore. Pacientët e rritur që janë mbi peshë apo obez janë ndër më të prekurit nga COVID-19, dhe ato përbëjnë më shumë se 70 për qind të popullsisë amerikane. Në të vërtetë, ndërsa lexoja të dhënat e provave të vaksinave Pfizer, hasa në këtë target grup: 70 për qind e pjesëmarrësve në provat e Pfizer për vaksinën kundër COVID-19, sipas demografisë së SHBA-së, ishin mbipeshë apo obez. Kjo qasje u prit me shumë entuziazëm nga specialistët e mbipeshës për krijimin e një grupi që përfaqësonte më së miri popullatën tonë aktuale të SHBA-së.
COVID-19 ka qenë shkatërruese në SHBA për njerëzit mbipeshë dhe obez, veçanërisht për pacientët më të rinj në moshë. Në fillim mjekët menduan se në tërësi pacientët më të rinj ishin më pak të rrezikuar ndaj komplikimeve të rënda për shkak të moshës së tyre. Por tek njerëzit më të rinj se 50 vjeç që janë mbipeshë, obeziteti e zhduku efektin mbrojtës të moshës.
Vaksina e COVID-19 është premtuese, sepse aktivizon qelizat imune B dhe T, thelbësore për mbrojtjen afatgjatë kundër viruseve. Aktiviteti dhe nivelet e qelizave B kanë qenë të ulëta pas infektimit si tek minjtë po ashtu edhe tek njerëzit që janë mbipeshë.
Këto qeliza imune mund të prodhojnë shpejt antitrupa të rinj edhe nëse nivelet e antitrupave bien me kalimin e kohës,qoftë edhe kur kanë mbetur pak antitrupa nga vaksinat e mëparshme. Antitrupat bllokojnë virusin që të futet në një qelizë dhe ta infektojë atë, ndërsa qelizat B dhe T i shkatërrojnë qelizat e infektuara nga virusi dhe parandalojnë shumimin e mëtejshëm të virusit dhe përhapjen në qelizat e tjera. Por kjo mund të mos jetë e vërtetë për njerëzit mbipeshë. Studiuesit besojnë se mbipesha ndikon negativisht në funksionimin e sistemit imunitar.
Megjithëse pacientët mbipeshë mund të prodhojnë antitrupa adekuat, studime të shumta tregojnë se ata kanë një nivel më të ulët të qelizave B dhe T pasi preken nga infeksioni i gripit H1N1. Kjo mund të ndryshojë përgjigjen tipike imune, duke e lënë trupin një hap pas virusit. Një pyetje e rëndësishme është nëse kjo përgjigje imune e ndryshuar është gjithashtu e pranishme pas infektimit me COVID-19. Dhe për këtë arsye, ne duam të dimë nëse vaksina do të jetë po aq efektive tek pacientët mbipeshë sa tek pacientët e tjerë që nuk vuajnë nga kjo sëmundje.
Megjithatë, pacientët mbipeshë apo obezë duhet ta marrin vaksinën COVID-19. Edhe për ata pacientë mbipeshë që marrin vaksinën e gripit por që ende preken nga gripi, ka pothuajse 40 për qind rënie të rasteve të shtrimit në spital dhe 82 për qind ulje të shtrimeve në repartet e terapisë intensive.
Me pak fjalë, të dhënat e publikuara nga Pfizer dhe FDA tregojnë se vaksina nuk është efektive vetëm tek pjesëmarrësit në tërësi, por në veçanti, edhe tek pacientët mbipeshë.
Është inkurajues fakti që Pfizer dëshironte të tregonte se vaksina ishte po aq efektive edhe tek ata që janë mbipeshë apo obez. Studiuesit po vërejnë se këta pacientë janë më të rrezikuar dhe tani po hartojnë studime për ta pasqyruar këtë.
Dy gjëra mund t`i inkurajojnë njerëzit mbipeshë apo obez, që të ushtrohen dhe të përmirësojnë zakonet e tyre dietike: Studimet e mëparshme tregojnë një lidhje pozitive midis stërvitjes së rregullt para marrjes së një vaksine dhe përgjigjes suaj ndaj vaksinës, duke prodhuar deri në katër herë më shumë antitrupa pasi të jeni ekspozuar ndaj një virusi apo bakteri. Kjo do të thotë që antitrupat janë më të lartë tek ata persona që janë ushtruar para marrjes së vaksinës kundrejt atyre që nuk janë marrë me ushtrime fizike.
Gjithashtu, vërehet se lloji dhe sasia e baktereve tuaja të zorrës mund të ndikojnë në reagimin ndajvaksinës. Ushqime që përmbajnë prebiotikë dhe probiotikë mund të ndihmojë në këtë dhe në parandalimin dhe trajtimin e sëmundjeve të tjera. Prebiotikët mund të gjenden tek elbi dhe hudhra, ndërsa probiotikët gjenden tek kosi, lakra turshi dhe disa lloje djathërash.
Nevojiten ende më shumë të dhëna para se të dimë saktësisht se si pacientët mbipeshë apo obez reagojnë ndaj vaksinave kur krahasohen me pjesën tjetër të popullatës. Por këto të dhëna do t`i kemi së shpejti. Edhe pse ka kaluar vetëm një vit nga pandemia, po të shikojmë prapa do të mbetemi të mahnitur nga të gjitha ato që kemi mësuar rreth COVID-19. Nga ky hulumtim do të vijnë njohuritë që na duhen për të krijuar një mënyrë më të mirë në ofrimin e kujdesit shëndetësor për të gjithë ne.
Burimi i lajmit: https://www.discovermagazine.com/health/will-the-covid-19-vaccine-work-as-well-in-patients-with-obesity
Përshtatur nga TIRANA TODAY
