Tërmeti që goditi vendin të martën la pasoja gjigande në Shqipëri. Një bilanc i frikshëm, 50 viktima, mbi 800 të plagosur dhe qindra ndërtesa të dëmtuara dhe të pabanueshme. Përpos kësaj, ende nuk ka një faturë ekonomike mbi dëmet e shkaktuara.
Në mbledhjen e sotme të qeverisë KM Rama tha: “7-15 vite burg për çdo ndërtues që leja i jepet për 3 kate dhe ndërton 15 kate”. Duke paralajmëruar masa dhe veprime penale në vijimësi, vath në vesh për kryebashkiakët dhe adminstratën.
Fatkeqësia e të martës nxori në pah dhe shumë ‘të palara’ të shtetit njëkohësisht. Prej ditësh, në shtyp komentohet që forcat shqiptare nuk ishin në lartësinë e situatës, pasi kishin një mungesë të theksuar pajisjesh dhe mjetesh të nevojshme për të bërë punën. Përveç guximit dhe dashurisë së madhe për të ndihmuar, ata s’kishin as doreza për të bërë punën e shpëtim-kërkimit në nivelin e kërkuar.
Gadishmëria e shprehur dhe e treguar e fqinjëve e mbuloi diellin me shoshë, pasi vendi mund të përballej me një tjetër fatkeqësi, paaftësinë për të menaxhuar fatkeqësinë dhe kaosin e krijuar.
Padyshim që kjo fatkeqësi nxori në pah dhe anën më të mirë të shqiptarëve, solidaritetin. Shqiptarët sot janë zgjuar krenar dhe me më pak frikë nga tërmetet, pasi panë sesi vëllezërit dhe motrat e tyre nga gjithë bota reaguan për të ndihmuar ata që janë nevojë dhe fatkeqësi.
Në emër të këtij solidariteti dhe të gjithë atyre shqiptarëve të ndershëm që këto ditë u angazhuan me mish e me shpirt për të ndihmuar të prekurit, duam të ngremë disa pyetje:
– A do të ketë një hetim kombëtar për atë çka ndodhi?
– A do të fillojë prokuroria një hetim të gjerë për të vënë përballë drejtësisë të gjithë ata persona fajtorë e përgjegjës që dhanë leje, çertifikuan apo mbyllën sytë përpara ndërtesave që s’plotësonin asnjë kriter teknik?
– A do të ketë një hetim mbi performancën e fondeve të emërgjencës?
Opinioni publik meriton përgjigje, në emër të atyre që humbën jetën, në emër të atyre që humbën të dashurit, e në emër të gjithë atyre që besojnë që ky vend mund të ndryshojë.
Tirana Today
