Ministri i Brendshëm, Sandër Lleshaj, ka komentuar vendimin e AKEP me kërkesë të Drejtorisë së Përgjithshme të Policisë së Shtetit për mbylljen e valëve të telefonisë celulare për disa orë më 21 shkurt, kur opozita protestoi para Kuvendit.
Ai nuk shoi kureshtjen e gazetarëve nëse edhe sot do të meren masa drastike, ndërsa qartësoi opinionin publik se një gjë e tillë nuk ka ndodhur në protestën e fundit.
“Nuk di të ketë masë drastike të tillë, dhe mbyllja e valëve telefonike nuk ishte masë drastike kur bëhet në shërbim të mbarëvajtjes së sigurisë së gjithë protestës apo jo pjesëmarrësve të saj”, u shpreh ministri.
Opozita ka mobilizuar strukturat për të protestuar pasditen e sotme, në orën 17:00, përpara Parlamentit. Kreu i Kuvendit, Gramoz Ruçi, vendosi të ndryshojë ditën e seancës plenare, e parashikuar për të enjten, për shkak se opozita kishte paralajmëruar sërish protestë. Por partitë opozitare kanë vendosur t’i kundërpërgjigjen këtij vendimi të kryeparlamentarit, duke njoftuar për zhvillimin e një proteste këtë pasdite.
