Ish-deputetja e LSI-së, Kejdi Mehmetaj thotë se nëse do të ketë një tryezë ajo nuk duhet të jetë për të zgjidhur problemet e partive politike.
Ish-deputetja, e ftuar në studion e lajmeve “RTV Ora” shprehet se tryeza duhet të jetë për problemet e qytetarëve, ndërsa tha se dyshon që kryeministri është i gatshëm për të diskutuar mbi shqetësimet e shqiptarëve.
“Nuk bëhet fjalë aktualisht për tu ulur në një tryezë për të zgjidhur problemet ndërmjet partive politike. Tani bëhet fjalë për tu ulur në tryezë, nëse do të ketë mundësinë e një ulje në një tryezë, për të zgjidhur problemet e shqiptarëve. A jemi të zotët ne të gjitha palët për tu ulur dhe për të folur për problemet e shqiptarëve?! Unë dyshoj që kryeministri është i gatshëm ta bëjë këtë gjë , sepse nëse është i gatshëm ta bëjë këtë gjë kjo do të thotë që të heq dorë nga karrigia”, deklaroi Mehmetaj.
Sa i përket ftesës së Ramës për dialog në lidhje me reformën zgjedhore, ajo tha se reforma zgjedhore nuk i zgjidh problemet.
“Reforma zgjedhore nuk është problemi i shqiptarëve. Shqiptarët nuk ushqehen me reformë zgjedhore. Fëmijët e shqiptarëve nuk shkollohen me reformë zgjedhore. Spitalet nuk i blejnë ilaçet nëpërmjet reformës zgjedhore”, tha Mehmetaj.
