Kryesuesja e misionit të OSBE-ODIHR-it, Audrey Glover, është prononcuar për mediat në lidhje me zgjedhjet e mbajtura, duke thënë që në krye të herës së procesi i 30 qershorit u mbajt pa marrë parasysh elektoratin shqiptar. Ambasadorja deklaroi se ende nuk kishin një qëndrim zyrtar nëse këto zgjedhje i arritën apo jo standardet.
E pyetur dhe për precedentin e ’96 që ngjason me atë të 30 qershorit, kreu i misionit të OSBE/ODIHR në Tiranë tha: “Duhet të them se në ’96 nuk isha këtu, por isha shefja e misionit. Ne nuk na takon të komentojmë rezultatet e zgjedhjeve, dhe ndikimit që do të kenë ato në politikat e brendshme të Shqipërisë dhe Bashkimit Europian. Nuk është puna jonë të themi se sa ndikojnë këto zgjedhje perspektivën për në Bashkimin Europian”.
Pjesë nga intervista
A kishte presion mbi votuesit?
“Po, kishte presion. Votuesit duhet ti njohin kandidatët e tyre…dhe kjo nuk ndodhi. Edhe votuesit vetë e kuptojnë, dhe presioni nuk duhet të lejohet”.
A janë përmbushur standartet në këto zgjedhje?
“Ne ende vazhdojmë të marrim informacione. Ende nuk e kemi tablonë e plotë për procesin zgjedhor. Derisa t’i marrim, nuk mund të themi përfundimisht nëse i kanë përmbushur apo jo standartet e duhura. Por pas 2 muajsh, ne do të japim raportin tonë përfundimtar”.
Sa shanse ka që këto zgjedhje të çertifikohen?
“Nuk është puna jonë të çertifikojmë këto zgjedhje. Janë autoritetet e këtij vendi, janë gjykatat nëse këto zgjedhje duhen të çertifikohen apo jo. Ne do të japim raportin tonë përfundimtar për këto zgjedhje”.
Gjatë ditës së sotme është raportuar për një numër më të lartë votash më shumë se sa pjesëmarrja. Çfarë mendoni për këtë?
“Në lidhje me numrin e votuesve, sapo e dëgjova këtë gjë, sepse siç thashë po marrim ende informacione. Jemi të interesuar të dimë më shumë për këtë çështje”.
A operoi KQZ në këtë proces si një institucion i pavarur?
“Nuk është se kemi arsye të supozojmë se nuk operoi si i pavarur. Ishte konstruktiv për sa i përket vijimit të procesit zgjedhor, ashtu siç kishte edhe disa raste kur vendimet ishin me pikëpyetje”.
A pajtoheni me opozitën, kur tha që KQZ është Komisioni Qendror i Vjedhjeve?
“Në fakt nuk i di këto akuza, duhet të di më shumë që të them: jam apo s’jam dakord”.
