31-vjeçari, Gert Shehu, i cili goditi Berishën në protestën e 6 dhjetorit, do të njihet nesër me masën e sigurisë. Prokuroria do t’i kërkojë gjykatës masën “arrest me burg”. Gjatë marrjes në pyetje, 31-vjeçari i ka qëndruar deklarimeve që ka dhënë që në fillim në lidhje me incidentin, ndërsa Prokuroria ka sekuestruar të gjitha kartelat mjekësore të tij. 31-vjeçari rezulton me precedent të mëparshëm penal, pasi është arrestuar me kanabis, ndërsa në 2017 është gjobitur për rrahje. Po ashtu është ndaluar nga policia edhe për prishje të qetësisë publike.
Gerti Shehu, tashmë gjendet në duart e mjekëve të spitalit, të cilët ende nuk kanë dalë në një konkluzion mbi gjendjen e tij fizike po as psikike. Për këtë të fundit është kërkuar një ekspertim i ri mental.
Ai pësoi dëmtime të shumta në fytyrë dhe në trup, dhe për rrjedhojë u transportua në Spitalin e Traumës ku ende po merr mjekimin e nevojshëm. Ndryshe nga dokumenti shëndetësor i publikuar ku tregohej se 31-vjeçari, Gert Shehu prej vitit 2018 kurohej për probleme të shëndetit mendor, Berisha tha se sulmi ndaj tij kishte qenë i organizuar, ndërsa shtoi se agresori i tij kishte qenë agjent i policisë kriminale.
