Në mbledhjen e Grupit Parlamentar të PD-së, Sali Berisha është shprehur se sot janë arrestuar thjesht disa “cironka” për inceneratorët. Berisha duke komentuar arrestimet e SPAK për inceneratorin e Fierit, tha se Edi Rama kërkon të mbyllë historinë e djegësve duke arrestuar “cironkat”. Kreu i Partisë Demokratike i mëshoi fort faktit se sot janë arrestuar punonjësit e ndërmarrjes, por ndërmarrja është e qeveritarëve. 11 ishin urdhër arrestet e lëshuara për inceneratiorin e Fierit. Prej tyre 5 janë ekzekutuar, ndërsa 6 persona mbeten në kërkim. Mes të arrestuarve ishte edhe biznesmeni dhe zëvendëspresidenti i FSHF-së, Arben Dervishaj.
“Duke arrestuar cironkat, punonjësit e ndërmarrjes së tij. Ata kanë përfituar diçka, por dihet që ndërmarrja është e qeveritarëve.
Ndërkohë vrapon rrufeshëm për të plaçkitur një pasuri publike të çmuar si Porti i Durrësit. Kaskadën po e nxore në treg, nuk ka as gjysmën e vlerës së Portit të Durrësit. Është pasuria më e madhe publike,” tha Berisha.
