Gjatë një takimi në Kamzë me gratë dhe vajzat, Rama tha se buxheti i vitit 2023 do të jetë dyfish më i madh se i vitit 2013. Sipas Ramës, ky është tregues pozitiv për punën e qeverisë. Lidhur me akuzat që vijnë nga opozita, Rama iu përgjigj duke thënë se për ta asnjëherë nuk mjafton.
“Nesër do kemi diskutimin për projektin e buxhetit për vitin e ardhshëm, në 2023 ne do të kemi dyfishin e buxhetit të 2013.
Tani unë besoj që kjo shifër mjafton për të gjithë ata që diskutojnë në hava, që gjërat kanë shkuar më keq ose që gjërat s’kanë ndryshuar. Sepse kemi dyfishin e buxhetit.
Dhe nuk është thjesht çështja që kemi dyfishin e buxhetit, por kemi shumë më tepër buxhet për të mbrojtur njerëzit nga kjo goditje e tretë që është dhe goditja më e vështirë, dhe për shkak se kanë ndodhur dhe dy të tjerat nuk është edhe e lehtë për ta përballuar siç mund të ishte njëra apo tjetra. Jo se ishin të lehta, por se sidoqoftë ishte një lloj ndjesie që ja do iki dhe kjo e pastaj gjërat do vijnë duke u përmirësuar shumë shpejt”, u shpreh Rama.
Kryetari i PD, Sali Berisha, duke folur në mbledhjen e grupit parlamentar, e cilësoi projektbuxhetin që do të diskutohet ditën e nesërme në Parlament si ogurzi. Berisha tha para deputetëve demokratë se ky buxhet çon një hap përpara falimentimin e ekonomisë shqiptare.
