Alfred Rushaj hoqi dorë nga mandati i deputetit të PD-së. Pritet që sot Rushaj të depozitojë dokumentacionin e tij në Komisionin Qendror të Zgjedhjeve, duke i lënë vendin një tjetër demokrati për të hyrë në Kuvendin e Shqipërisë. Deri më tani raportohet se Rushaj ka dhënë dorëheqjen, duke e argumentuar me arsye personale.
Demokrati Alfred Rushaj është një emër i njohur për demokratët, pasi ka mbajtur poste të rëndësishme në qeverinë Berisha. Ai ka shërbyer si zv.ministër i Financave nga viti 2009 deri në vitin 2013 dhe si këshilltar juridik i Ministrit të Ekonomisë, Tregtisë dhe Energjisë nga viti 2005 deri në vitin 2009. Nga viti 1997 deri 2005 ka mbajtur disa pozicione menaxheriale dhe ekzekutive në Korporatën Elektroenergjetike Shqiptare (KESh), ka qenë Kryetari i Bordit Mbikqyrës të OSSH, Anëtar i Bordit të Drejtorëve të OST, Anëtar i Bordit të Drejtues për Agjencinë e Burimeve Natyrore, por ka mbajtur edhe pozicione të rëndësishme drejtuese në kompani të mëdha që operojnë në Shqipëri.
Ndërkohë pritet që në vend të tij në Kuvendin e Shqipërisë të hyjë Petrit Doda, i renditur i 32-ti në listën e kandidatëve të PD-së në Tiranë për zgjedhjet e 25 prillit të vitit të kaluar.
I kontaktuar nga “Abcnews.al”, Doda është shprehur se e ka marrë vesh lajmin nga mediat, por deri tani ai nuk është kontaktuar as nga partia dhe as nga Komisioni Qendror i Zgjedhjeve.
“Po e shoh në lajme, deri më tani nuk kam marrë asnjë informacion as nga partia dhe as nga KQZ-ja”, u shpreh Doda.
