Protesta e pedagogëve për rritjen e pagave pas bojkotit mësimor, do të përshkallëzohet në formën e grevës së urisë. Kjo është njoftuar nga Kreu i Sindikatës së Pedagogëve, Sandër Kovaçi. Ai njoftoi se qeveria do të ketë kohë të reflektojë mbi qëndrimin e saj deri të mërkurën në orën 16:00 të datës 2 nëntor, në të kundërt pedagogët do të nisin grevën e urisë pa afat.
“Ne këtë betejë e kemi filluar prej tre vitesh, por e kemi intensifikuar dy muajt e fundit. Qeveria ka treguar se nuk ka veshë për të dëgjuar problematikat tona, apo sy për të parë gjendjen e universiteteve tona.
Ofron gjithmonë zgjidhje makiazh pa e shoqëruar me vendime konkrete. Së fundmi është vënë me initimidim dhe presione që të shuhet kauza jonë e drejtë. Është propozuar që të kalohet në formën e grevës së urisë dhe që në këtë fazë mund të ndërgjegjësojë opinionin e brendshëm dhe atë ndërkombëtar, që të dëgjohet kauza jonë.
Kërkoj miratimin për këtë akt të padëshirueshëm, por të nevojshëm me një ngritje dore. I lëmë kohë qeverisë deri të mërkurën për të gjetur zgjidhje. Në të kundërt të gjithë të mërkurën të jemi këtu në orën 16:00 për solidarizim ndaj të gjithë atyre që kanë marrë përsipër këtë akt sakrifice”, përfundoi ai.
Pedagogët vijojnë protestat dhe bojkotin e mësimit prej disa javësh. Pedagogët kërkojnë rritje të pagës në masën 50% brenda 2 viteve, dhe investime në arsimin e lartë. Kërkesat e tyre për një rritje të tillë pagash janë konsideruar të paarsyeshme nga qeveria.
Qeveria mori vendim më 5 tetor që pagat e pedagogëve të rriten deri në 15%. Nga kjo shifër 7% do të mbulohet nga buxheti i shtetit, ndërsa pjesa tjetër nga vetë universitetet.
