Kryetari i PD-së së Librazhdit Bujar Vreto, në një intervistë për “Euronews Albania” u shpreh se marrëveshja mes PD-së dhe PL-së të drejtuar nga Ilir Meta është jashtë çdo morali politik. Teksa u kthye pas në kohë duke bërë një bilanc të situatës, ai tha se Meta i ka shërbyer me një devotshmëri të jashtëzakonshme Ramës, duke i dhënë gjithë pushtetin.
“Ata që çfarë nuk kanë thënë për njëri-tjetrin, e gjejnë një gjuhë, por çfarë do t’i thonë popullit këta? A ju kujtohet viti 2000 kur do futeshim në Vlorë me Berishën, Meta ishte kryeministër. Jemi dhunuar dhe persekutuar nga policia e Ilir Metës, kam qenë i shtruar dy javë në spital se policia e Edmond Kosenit më ka dhunuar dhe kam brinjë te krisura. Si do e harrojnë demokratët bllokun e Ilir Metës? Si do e harrojnë demokratët tradhtinë që ndodhi nga Meta? Si ka mundësi që në 2013 me një ngjalë, Meta iku tek Rama? Meta miratoi reformën territoriale, më e keqja për popullin shqiptar. Miratoi 8 ligjet e reformës në drejtësi, që sot është në dorën e Ramës. Meta i ka shërbyer me një devotshmëri të jashtëzakonshme Ramës, duke i dhënë gjithë pushtetin”, tha ai.
Kryetari i Partisë Demokratike, Sali Berisha dhe kryetari i Partisë së Lirisë, Ilir Meta nënshkruan marrëveshjen e bashkëpunimit për zgjedhjet lokale të 24 majit 2023.
Marrëveshja u nënshkrua pas konstatimit se Shqipëria është në momente kritike: për shkak të korrupsionit shkatërrimtar; të asgjësimit të pluralizimit politik në nivel vendor; të shpopullimit masiv dhe tragjik; të krizës ekonomike, që po çon në kolaps vendin; të qeverisjes së kapur peng nga trafiqet, paraja e pisët dhe korrupsioni.
Dy partitë opozitare do të dalin me kandidatë të përbashkët në zgjedhjet e ardhshme vendore, të cilët do të vendosen nga rezultati i konkurrimit në primare që do të organizohen nga PD-ja.
Ndërkaq Partia e Lirisë do të ketë kryetarët e Këshillave Bashkiakë në ato zona, ku kjo parti është vendimtare për të krijuar shumicën.
Data e zgjedhjeve të ardhshme vendore u dekretua pak ditë më parë nga presidenti Bajram Begaj. Procesi do të zhvillohet më 14 maj të vitit 2023.
Aksioni i radhës i bashkëpunimit mes PD-së dhe PL-së do të jetë protesta e 12 nëntorit. Sipas opozitës, kjo protestë do të jetë nisja e betejës kundër “regjimit Rama” siç e cilësojnë Berisha dhe Meta.
