Në Gjykatën e Apelit në Tiranë, sot pritet vendimi për deputetin e PD-së, Ervin Salianji, në lidhje me dosjen “Babale”. Salianji u shpall fajtor për veprën penale “kallëzim i rremë” në lidhje me çështjen “Babale” dhe u dënua me 1 vit burg nga gjykata e Shkallës së Parë. Në Apel e ka çuar çështjen dhe gazetari Jetmir Olldashi, i cili u dënua me 6 muaj burg të konvertuar në 100 orë shërbim komuniteti. Nëse Apeli do të konfirmojë vendimin e Shkallës së Parë, atëherë deputeti Salianji rrezikon burgun.
Salianji dhe gazetari Jetmir Olldashi u shpallën fajtorë nën akuzën e “kallëzimit të rremë” lidhur me inskenimin e audio-përgjimit me qëllim përfshirjen e vëllait të ish-ministrit të Brendshëm Fatmir Xhafaj në trafikun e drogës. Gjykata e Shkallës së Parë vendosi 1 vit burg për ish-deputetin Salianji, me akuzën e “kallëzimit të rremë kryer në bashkëpunim”.
Në mbështetje të Salianjit, në gjykatë kanë shkuar edhe disa deputetë të PD-së, përfshi këtu ata të grupit të Alibeajt dhe Berishës. Në seancën e parë që duhej të mbahej në 4 korrik, Salianji tha se procesi është i manipuluar me një dëshmitar të rremë.
