Mjeku Ilir Alimehmeti ka mohuar lajmet se do të kandidojë për postin e kryetarit të Bashkisë së Tiranës në zgjedhjet e ardhshme vendore, që do të mbahen pranverën e ardhshme. Ai tha se çdo gjë ka kohën e vetë, dhe se ai nuk beson te gjërat të cilat nuk janë të pjekura dhe nuk vijnë nga personat e duhur, në momentin e duhur.
“Unë kandidat? Ju jeni duke iu referuar disa burimeve, por duhet të pyesni burimet e duhura për këtë informacion. Duhet të them që tek unë nuk ka ardhur asnjë gazetar që të më pyesë, dhe ta konfirmojë këtë gjë.
Me qetësi. Gjërat duan kohën e vetë. Unë nuk besoj në mënyrë absolute tek gjërat që nuk vinë të pjekura nga personat e duhur, në momentin e duhur. Deri në këtë moment janë mediatike”, tha Alimehmeti në Top News.
Ilir Alimehmeti është lakuar si kandidat i mundshëm i opozitës për kryetar të Bashkisë së Tiranës. Në media të ndryshme thuhej se Alimehmeti është propozuar si kandidat unik i opozitës për kryebashkiak në zgjedhjet e vitit të ardhshëm.
