Pedagogët e universiteteve aktualisht po zhvillojnë një protestë, ku kërkojnë rritjen e pagës. Ata janë mbledhur para Universitetit Politeknik në Tiranë, ku i mëshojnë faktit për plotësimin e kërkesave të tyre.
Në të kundërt u shprehën se nuk do të hyjnë në auditore. Pedagogët kërkojnë që arsimi i lartë të shihet si prioritet në Shqipëri.
Kreu i Sindikatës së pedagogëve, Aleksandër Kovaçi, i ka bërë thirrje kryeministrit Edi Rama nga protesta që po mbahet para Universitetit Politeknik të Tiranës, që të reflektojë dhe të rrisë pagat.
“E mirëpresim kryeministrin për Rektoratin, por jo lëmoshë apo karamele. Me lëmoshë nuk gënjehemi! Bëhet fjalë për qëndrim esencial ndaj arsimit të lartë publik.
Që ti përgjigjet ekonomisë së vendit dhe kërkimit shkencor. Pa kërkim shkencor nuk ka zhvillim. Rritja 50% për dy vite, është e panegociueshme. Dhe për vitet e ardhshme dy herë. Nëse bëhet kjo rritje, nuk shkojmë as sa Kosova, 1200 euro”, tha ai.
