Sonjela Ymerllari, 13-vjeç, e cila vuante nga skolioza, me ndryshime të funksionit nervor të anësive të sipërme dhe të poshtme, është një tjetër rast që ka patur përparime të jashtëzakonshme.
Tre muaj më parë, Sonjela i’a doli mbanë me ndërhyrjen kirurgjikale në Turqi. Pas rikuperimit, ajo u kthye me familjarët e saj në Shqipëri. Muaj më parë, gjendja e saj ishte tejet e rënduar e ndërsa shpresat ishin shuar, pasi sëmundja i kishte avancuar në 95% të saj, duke i prekur çdo organ, e duke i rrezikuar jetën.
Rasti i publikuar nga “Fundjavë Ndryshe” mori vemendjen e donatorëve. “Top Channel” mori përsipër dhurimin për operacionin e Sonjelës, duke i dhënë mundësinë e rikthimit drejt normalitetit. “Fundjavë Ndryshe” është rikthyer sërish në shtëpinë e Sonjelës, për të parë se çfarë ka ndryshuar në jetën e saj.
Në të vërtetë mrekullia ka ndodhur, pasi ajo është në gjendje të mirë shëndetësore, dhe rikuperimi i saj është i ndjeshëm. Familjarët thonë se falë operacionit që shkoi mjaft mirë, jeta e saj ka ndryshuar. Ajo po shkon në fizioterapi, dhe po përmirësohet dita-ditës.
