Kampionia e Europës në atletikë, Luiza Gega, është pritur në Qendrën e Solidaritetit “Fundjavë Ndryshe”, ku është takuar me drejtorin ekzekutiv Arbër Hajdari.
Luiza Gega e cila është vlerësuar me titullin “Kordoni i madh me Yllin për Mirënjohje Publike”, për të gjitha sakrificat për të ngritur lart flamurin shqiptar, do të japë kontributin e saj dhe në “Fundjavë Ndryshe”.
Themeluesi i fondacionit të bamirësisë njofton se Luiza Gega do të jetë pjesë e “Fundjavë Ndryshe” në disa projekte në të ardhmen. Arbër Hajdari thotë me anë të postimeve në rrjetet sociale, se me rekordmenen e Europës kanë diskutuar për kauzat e fondacionit, ku arsimimi, edukimi e sporti janë prioritare.
“Qendra e Solidaritetit Fundjavë Ndryshe, sot kishte një vizitore të veçantë, që ka bërë krenar çdo shqiptar. Me Luiza Gegën, Kampionen e Rekordmenen e Evropës, folëm për kauzat e fondacionit, ku arsimimi, edukimi e sporti janë prioritare. Me shumë dashamirësi Luiza do të jetë pjesë e Fundjavë Ndryshe në disa projekte në të ardhmen”.
Pak ditë më parë, në një ceremoni të organizuar në Kryeministri në nder të atletes shqiptare Luiza Gega e cila u shpall kampione Europe ne garën 3000 m me pengesa, kryeministri Edi Rama nderoi kampionen me “Kordonin e madh me Yll të Mirënjohjes Publike”, në ceremoninë që vijoi në Sallën e Hartave, në Kryeministri. Teksa i dorëzoi Medaljen e nderit, Kryeministri Rama tha se me fitoren e saj të merituar Luiza i ka dhënë sportit dhe Shqipërisë, letra të reja fisnikërie, si dhe imazhin e një Shqipërie që i’a del me kokën lart mes gjithë të tjerëve.
