Kreu i Partisë së Lirisë, Ilir Meta, ka prezantuar në konferencën për mediat iniciativën e parë ligjore që do ndërmarrë në shtator në Kuvend, për të garantuar indeksimin e pagave. Meta do të jetë në krah të Sali Berishës, ndonëse ende nuk ka një vendim nga Gjykata e Apelit për kontrollin e PD-së. Ai tha shkurt dhe qartë se njeh vetëm një Parti Demokratike dhe ajo drejtohet nga Sali Berisha.
“7 korriku ishte një tregues i qartë i këtij zgjimi të vlerave më të mira me të cilat është themeluar PD-ja si parti e vlerave. Do bashkëpunojmë shumë ngushtë”, tha Meta.
Ish-Presidenti Ilir Meta, i pyetur nëse ka besim tek SPAK-u, u shpreh sot se drejtësia shqiptare është nën presionin e qeverisë.
“Fakti që vazhdojnë pagesat e inceneratorëve është përgjigjja më e mirë. Personat e përfshirë në aferën më të zezë dhe skandaloze në këtë vend, ku 14 vendime qeverie nëse do ndiqnin procedurën normale do duhet të miratoheshin për muaj të tërë, kalojnë për 2 minuta edhe pse qeveria është paralajmëruar me vulë që po bën veprime të paligjshme. Kjo është më e qarta. Jam i sigurt që drejtësinë do e bëjë populli. Drejtësia është nën presionin e Ramës.
Kemi pasur opozitën të kapur nga qeveria, drejtësia do fillojë të çlirohet kur të shohë popullin që do ngrihet. Besoj tek populli. Ai do ta mësoj shumë mirë dhe shumë shpejt kush është populli i Shqipërisë, meqë mendon se e ka futur në laborator. Do e shikojë ku do përfundojë, nën këmbët e popullit të Lirisë, është premtim. Nëse do kishte drejtësi, do ishte në qeli, ose tek 5-sa me mjekun tek koka e policin tek dera”.
