Shoqëria Koncensionare Integrated Energy (IEBV) ka përgënjeshtruar deklaratat e kryetares së LSI-së, Monika Kryemadhit se me inceneratorin e Tiranës bashkëpunojnë 24 kompani. Përmes një deklarate publike, IEBV deklaron se kompania nuk ka asnjë furnitorë nga subjektet që u përmendën nga Kryemadhi, si dhe nuk ekziston asnjë shkëmbim tregtar. Në deklaratën e shpërndarë në Facebook, nënvizohet se IEBV nuk ka furnitorë asnjë nga subjektet e përmendura nga Kryemadhi. Për rrjedhojë nuk ka asnjë shkëmbim tregtar me asnjë prej tyre. Duke qëndruar në të njëjtën linjë, sqarohet më tej se kompanitë që përmend Kryemadhi nuk janë bashkëpunëtore në veprimtaritë e tyre. Një ditë më parë, Kryemadhi paralajmëroi se do të depozitojë në SPAK dosje të tjera, për aferën korruptive të inceneratorëve. Monika Kryemadhi ka thënë se janë 24 kompani të cilat janë të lidhura dhe dyshohet se kanë kryer evazion fiskal me Klodian Zoton të lidhur me inceneratorët.
Njoftimi
TIRANE. Dt. 5. 7. 2022
Deklaratë e Shoqërisë Koncesionare Integrated Energy B. V. SPV
Ditën e djeshme opinioni publik ra preh e dizinformimit të qëllimshëm, me akuzat e hedhura kundrejt Shoqërisë tonë nga kryetarja e partisë Lëvizja Socialiste për Integrim (LSI) Znj. Monika Kryemadhi. Sipas saj një skemë mashtrimi me TVSH, e disa kompanive fiktive që kanë operuar në Shqipëri ka përfshirë Integrated Energy B. V. SPV (IEBV). Po sipas saj këto kompani kanë pasur marrëdhënie tregtare me Shoqërinë Koncesionare Integrated Energy B.V. SPV. e cila ndërton dhe menaxhon Zonën e Trajtimit të Mbetjeve në Tiranë.
Në interes të publikut deklarojmë se:
IEBV, nuk ka furnitorë asnjë nga subjektet e përmendura nga Znj. Kryemadhi. Për rrjedhojë nuk ka asnjë shkëmbim tregtar me asnjë prej tyre. Kompanitë që përmend Znj. Kryemadhi nuk janë bashkëpunëtore në veprimtaritë tona.
Asnjë shpifje dhe baltosje nuk mbulon investimin dhe punën e Shoqerisë Koncesionare IEBV.
Dokumentet dhe e vërteta janë të aksesueshme. Investimi dhe puna e përditshme po ashtu. Ne refuzojmë çdo shpifje, hamendje, apo dashakeqësi që keqinformon publikun për qëllime politike apo çfarëdo qëllimi tjetër.
Ftojmë mediat të vijnë pranë Zonës së Trajtimit të Mbetjeve, jemi të hapur për çdo sqarim dhe të gatshëm për të hedhur dritë mbi të vërtetën.
Integrated Energy B.V. SPV
