Sipas një studimi të ri të botuar në revistën Annals of Internal Medicine, pirja e kafesë së ëmbël ose pa sheqer është e lidhur me një rrezik më të ulët të vdekjes në krahasim me mos pirjen e saj.
Studiuesit anketuan 171.616 pjesëmarrës në Mbretërinë e Bashkuar deri në pesë herë gjatë një viti në lidhje me stilin e tyre të jetesës, duke përfshirë zakonet e tyre të pirjes së kafesë. Shkencëtarët më pas kërkuan certifikatat e vdekjes, për të parë se kush kishte vdekur mesatarisht shtatë vjet më vonë.
Pjesëmarrësit varionin nga mosha 37 deri në 73-vjeç dhe raportuan se nuk kishin sëmundje kardiovaskulare ose kancer në kohën e sondazhit.
Rezultatet treguan se për njerëzit që pinin një sasi të moderuar kafeje, të përcaktuar si 1.5 deri në 3.5 filxhanë në ditë, ata që e ëmbëlsuan kafenë e tyre kishin rreth 30% rrezik më të ulët të vdekjes në krahasim me ata që nuk pinë kafe, sipas Dr. Christina Wee, profesore e mjekësisë në Shkollën Mjekësore të Harvardit,
Ata që pinë kafe pa sheqer kishin midis 16% dhe 29% rrezik më të ulët të vdekjes, krahasuar me ata që nuk pinë kafe, shtoi ajo.
Gjetjet u përshtatën për faktorët socio-demografikë, stilin e jetës dhe klinikë për të eliminuar efektet e tyre në rezultate. Për shembull, ekipi hulumtues bëri pyetje rreth nivelit të pirjes së duhanit, sasisë së aktivitetit fizik, nivelit të edukimit dhe zakoneve dietike, tha Wee.
Ka një kufi për rregullimet e studiuesve, sepse ata nuk pyetën për faktorë të tjerë që mund të ndikojnë në rezultatet si niveli i të ardhurave dhe profesioni, tha ajo.
Marrë me shkurtime nga CNN. Përshtatur nga Tirana Today
