Këngëtari i njohur Endri Prifti, i ftuar në “ABC e Mëngjesit”, zbuloi se aktualisht është në proces gjyqësor me ish-bashkëshorten, ndërsa ka bërë një paralajmërim të fortë. Më herët, ai bëri një denoncim për grabitjen e shtëpisë nga ana e ish-bashkëshortes së tij, Anjeza Kolevica, me ndihmën e Kadastrës së Korçës.
Ky denoncim nuk u prit mirë nga ish-bashkëshortja e këngëtarit, dhe u pasua me një reagim të ashpër dhe me akuza të rënda ndaj Priftit. Ai ka paralajmëruar se kush cënon ta vjedh atë, do të përfundojë në burg.
“Unë s’di të gënjej asnjëherë. Unë di të them akoma të vërtetën. Kush cënon të më vjedhë mua, do të përfundojë në burg. Ekziston Reforma në Drejtësi. Jam akoma në proces gjyqësor”, tha këngëtari.
Më 20 Prill 2022, emisioni “Stop” transmetoi denoncimin e këngëtarit korçar Endri Prifti, i cili foli për grabitjen e shtëpisë nga ana e ish-gruas, me ndihmën e Kadastrës së Korçës.
Në Gjykatën e Korçës, çifti Endri Prifti dhe Anjeza Kolevica u ndanë në vitin 2010, ndërsa në vitin 2017 ish-bashkëshortët ishin në proces gjyqësor për përpjesëtimin e pasurisë.
Në vitin 2019, gjyqtari Besnik Shehu nxori një vendim, që apartamenti i çiftit që ishte në proces përpjesëtimi, duhet të bllokohej në Kadastrën e Korçës dhe të mos tjetërsohej derisa të përfundonte procesi.
Vendimi i gjyqtarit Besnik Shehu nuk u zbatua nga Kadastra e Korçës, me pretendimin se nuk i kishte mbërritur shkresa, në një kohë që gjykata konfirmoi të kundërtën. Për pasojë, apartamenti që ishte në emër të ish-gruas, u shit prej saj dy herë brenda 1 muaji.
Pas denoncimit të këtij rasti, Prokuroria e Korçës ka regjistruar procedimin dhe sekuestruar apartamentin, që ish-gruaja e këngëtarit Endri Prifti e mori dhe e shiti pa të drejtë.
