Ish-kryeministri Sali Berisha ka shprehur qëndrimin e tij, referuar propozimit të emrave për President. Ai e cilësoi procesin e nisur në Partinë Demokratike për propozimin e emrave të kandidatëve për Kreun e Shtetit, si një parodi të neveritshme. Berisha u shpreh se ky proces është i iniciuar nga kryeministri Rama, dhe i mbështetur nga dy-tre persona në grupin parlamentar të PD-së.
“Partia Demokratike është forcë kryesore e opozitës, dhe ajo funksionon mbi bazë procedurash dhe precedentësh. Gjithçka shihni ju janë një parodi e neveritshme, dëshmi tjetër e keqshfrytëzimit ekstrem nga Edi Rama të individëve të caktuar, që për arsye të caktuara pranojnë të vetëposhtërohen. Por që nuk përfaqësojnë asgjë nga Partia Demokratike.
Ne kemi bërë të qartë para jush, qëndrimet tona. Çdo gjë që Edi bën me Ali Bashën, është një praktikë do të thosha denigrimi. E shpërfytyrimit të një njeriu apo dy-tre njerëzve që një Zot e di se çfarë hallesh kanë. Ndodh që të përgënjeshtrohen flakë për flakë në studio televizive, për mashtrimet që kanë bërë”, tha Berisha.
