Data 25 maj do të jetë ditë pushimi zyrtar për administratën publike, për qarkun e Tiranës. Në këtë ditë mbahet finalja e Conference League. Lajmi u bë me dije nga Ministri i Brendshëm, Bledi Çuçi, ku tha se data 25 maj është caktuar me vendim qeverie ditë pushimi zyrtar, për të gjitha institucionet publike të qarkut të Tiranës. Ai sqaroi se ky vendim është marrë në kuadër të masave, për këtë event të madh sportiv për vendin tonë.
“Sot qeveria mori vendimin që datën 25 ta shpallë si ditë pushimi për të gjithë institucionet publike që janë pjesë e qarkut të Tiranës. Pra do jetë ditë pushimi për gjithë zyrtarët publikë të qarkut Tiranë”.
“Kjo masë merret ne vijim të masave për të organizuar në mënyrë sa më shembullore një nga eventet më të mëdha qe i ka ndodhur Shqiperisë, siç është finalja e konferencës së Ligës Evropiane, ku ne presim që të kemi një fluks njerëzish që do vijnë jo vetëm nga Italia dhe Hollanda. Deri tani kemi pritshmëri e interes nga gati 5-6 herë më shumë njerëz për bileta se sa ka kapacitet stadiumi “Air Albania”.
Po marrim masat që të jetë një ditë feste për të gjithë, jo vetëm sportdashësit italianë”, tha ministri Çuçi.
Po kështu, Ministri i Brendshëm lajmëroi se 25 maj 2022, “do jetë ditë pa makina në të gjithë Tiranën, përveç urgjencave dhe nevojave të të gjithë organeve që do merren me mbarëvajtjen e eventit”.
“Akset hyrëse do bllokohen në datë 25 deri në 18:00 pasdite. Kushdo që do t’i bashkohet festës mund të vijë në Tiranë pas kësaj ore. Kështu do garantojmë që fluksi të menaxhohet në mënyrë shembullore”, tha ministri.
