Mbrëmjen e djeshme, një autobus i Unazës u përplas me një makinë duke përfunduar në Lanë e duke lënë 5 persona të plagosur. Të plagosurit, për fat të mirë ndodhen jashtë rrëzikut për jetën. Autobusi “Go Green” është “shndërruar” në urë duke zënë poshtë makinën.
Autobusi përfundoi në lumin Lanë, pasi një makinë i preu rrugën dhe për pasojë të lënduar lehtë kanë mbetur shoferi i autobusit Muhamet Kyçyku, 62 vjeç, faturino 61 vjeç, drejtuesi i autoveturës Jurgen Rama, 27 vjeç, një pasagjere e autobusit, F. Ç., 64 vjeçe, dhe pasagjeri i autoveturës, A. H., 27 vjeç.
Ka qenë ndërhyrja e dy banorëve të zonës, të cilët kanë bërë të mundur nxjerrjen e menjëhershme të dy të rinjve nga mjeti, që kishte zënë autobusi dhe më janë dërguar me shpejtësi në spitalin e Traumës. Grupi hetimor po punon për sqarimin e rrethanave të aksidentit. Nga sa është raportuar paraprakisht, makina i ka prerë rrugën autobusit, megjithatë vijojnë hetimet për të zbardhur të plotë të gjithë ngjarjen.
Veliaj: Zoti na ndihmoi të mos kishim një tragjedi në Tiranë
I pranishëm në vendin e ngjarjes ka qenë edhe kryebashkiaku i Tiranës, Erion Veliaj, i cili tha se fat të mirë, nuk u regjistrua në tragjedi. Veliaj ka bërë me dije se për fat të mirë nuk ka persona të lënduar nga aksidenti, teksa tha se po punohet për heqjen e autobusit dhe makinës nga Lana.
“Asnjë njeri i dëmtuar rëndë, drama njerëzore përfundoi këtu. T’i lëmë punën policisë, të lëmë profesionistët e policisë dhe zjarrfikësit dhe inxhinierët që do të zhvendosen nga Lana. Për sa kohë jeta e njeriut është jashtë rrezikut, do i gjejmë një mënyrë me vinç ose jo për t’i nxjerrë nga Lana. Zoti na ndihmoi të mos kishim një tragjedi në Tiranë”, tha Veliaj.
Manastirliu viziton të plagosurit në spital
Ministrja e Shëndetësisë, Ogerta Manastirliu, vizitoi të plagosurit në spital, ku tha se kanë marrë dënimte të lehta, të rikuperueshme. “Keni shpëtuar për mrekulli, ka qenë realisht një mrekulli. Falë Zotit keni shpëtuar. Me dëmtime të lehta të rikuperueshme thonë mjekët. Unë qëllova aty. Ishin dy çuna të lagjes që ju kanë nxjerrë. Ambulanca ka ardhur në kohë. I kemi nxjerrë në kohë reale. Direkt ka ardhur ambulanca”, tha Manastirliu.
