Shefi i Grupit Parlamentar të Partisë Demokratike të Kosovës, Abelard Tahiri, ka përdorur një gjuhë aspak etike sot në Kuvendin e Kosovës. Teksa po protestonte kundër fjalimit të ministres Albulena Haxhiu, Tahiri ka sharë në Kuvend.
Debati në Kuvend degradoi pasi ministrja Haxhiu ia përmendi Tahirit armët shurdhuese, të cilat ai i kishte porositur në kohën kur kishte shërbyer si këshilltar i Hashim Thaçit.
“Ju nuk keni të drejtë t’i thoni mbylle Ministres së Drejtësisë dhe askujt tjetër z. Tahiri”, tha Haxhiu.
“Pse po shqetësohesh, ndoshta për shkak të shurdhuesve a?”, shtoi Haxhiu.
Shefi i Grupit Parlamentar i Partisë Demokratike të Kosovës, Abelard Tahiri, ka kërkuar falje për sharjen që bëri në seancën e sotme të Kuvendit.
Para deputetëve, Tahiri tha se “kushdo që mund të ndihet i ofenduar, i kërkoj falje, por edhe qytetarëve. Sepse pakënaqësinë time e shprehi në rrethana të tjera, por jo duke sharë”.
“Në asnjë rrethanë nuk e kam menduar, nuk e shaj asnjë deputet të Kuvendit të Kosovës. Nëse ka qenë në afekt për shkak të situatës, por kjo nuk i është drejtuar asnjë deputeti”, deklaroi ai.
