Gjatë mesditës së sotme, kryeministri Rama në një lidhje live në Facebook shpjegoi detajet e asaj që ai e quajti “Paketa e Rezistencës” me qëllim përballimin e pasojave të krizës nga rritja e çmimeve.
Rama tha në fillim të fjalës së tij se i vinte turp që Shqipëria ishte vendi i parë i NATO-s, ku protestohej për pasojat e luftës në Ukrainë.
“Mua sot më vjen turp që Shqipëria është i vetmi vend i NATO-s dhe i Europës që protestohet për pasojat e para të luftës në Ukrainë. Vetëm ata që bëjnë sikur nuk kuptojnë thonë se kërcimi i çmimit të naftës nuk është pasojë e luftës”, tha Rama.
Kryeministri theksoi se qeveria paguan tani 80% të faturës reale të çmimit të energjisë elektrike, për shkak të rritjes së madhe të çmimeve të saj në bursë.
“Nëse mbahet çmimi mesatar, atëhere do të na duhet të paguajmë 250 milion euro ekstra. Kjo qeveri është krejt e kundërta e asaj që thonë ata që protestojnë në emër të popullit me dritën e iPhonëve”, tha kryeministri.
Qeveria zhvilloi një mbledhje për të vendosur skenarët për krizën. Në mbledhjen e tij të parë, Bordi i Transparancës vendosi që çmimi i naftës për periudhën 12-15 mars 2022, të jetë 217 lekë/litri.
Menjëherë pas vendimit, kompanitë e tregtimit të naftës kanë pasqyruar në pikat e karburantit uljen e çmimit të naftës.
Çdo operator i shitjes me shumicë dhe pakicë të nënprodukteve të naftës, është i detyruar të zbatojë Vendimin e Bordit të Transparencës në lidhje me çmimet e shitjes me shumicë dhe pakicë.
