Forcat e Ndërhyrjes së Shpejtë ka qenë të pranishme mbrëmjen e djeshme në Fier, në një aksion “blic” për kontrollin e makinave luksoze dhe atyre me targa të huaja. Pikat hyrëse dhe dalëse të qytetit kishin prani të shtuar të uniformave blu, mirëpo kontrolli u shtri dhe në akse të tjera. Automjetet luksoze dhe ato me targa të huaja, kanë qenë në “sitën” e efektivëve.
Grupe kontrolli të përbëra nga Forcat e Ndërhyrjes së Shpejtë, Struktura e Hetimit në Drejtorinë e Policisë Fier, oficerë e agjentë të Krimeve në Komisariatin e Policisë Fier dhe Patrulla e Përgjithshme, kanë zbritur në terren, duke ngritur disa postblloqe.
Burime pranë Policisë së Fierit kanë bërë me dije se fokusi ka qenë kapja e personave në kërkim, atyre që qarkullojnë me armë zjarri apo atyre që tentojnë të shpërndajnë lëndë narkotike.
