Pa humbur kohë, presidenti Meta i është përgjigjur thumbave të kryeministrit Rama. Presidenti Ilir Meta i ktheu përgjigje deklaratave të Ramës, se më 6 mars për zgjedhjet e pjesshme do të jetë edhe përballë popullit të 2 marsit. Kreu i shtetit tha se këto deklarata janë “kurthe dilitantësh” dhe se nuk ka ndëmend që të marrë pjesë në asnjë garë politike partiake deri më 24 korrik.
“Këto janë kurthe dilitantësh dhe koha e teatrit të kukullave në politikë përfundoi me 25 prillin. Kështu që presidenti Ilir Meta as nuk ka marrë, as nuk ka ndërmend të marrë pjesë në asnjë garë politike partiake deri më 24 korrik. Sigurisht, kemi bërë një premtim solemn që pas 24 korrikut do të bashkëbisedojmë me popullin heroik, patrioti dhe sovranist të 2 marsit. Ata që i ka marrë malli të ballafaqohen me Ilir Metën, do ta kenë mundësi shumë shpejt”, tha Meta.
Një përgjigje kreu i shtetit e pati edhe për deklaratën e Ramës, se do të këshillohet me popullin për emrin e ri të presidentit. “Shpresoj t’i shkojë mirë konsulta me qytetarët për këto çështje. Unë e kam konsultën me popullin e 2 marsit, në momentin e duhur”, tha Meta.
Kryeministri Edi Rama sulmoi sot presidentin Ilir Meta, ku u shpreh se pas shumë dekretimeve në shkelje të Kushtetutës, ai vendosi të dekretojë 6 marsin si ditën e zgjedhjeve të pjesshme lokale. Rama është ndalur edhe një herë tek shkarkimi Metës, duke thënë se në muajin prill, do të zgjidhet emri për Presidentin e ri të Republikës së Shqipërisë. Ndër të tjera ai u shpreh se duhet t’i japim Shqipërisë, një president normal.
“Një kryetar dhe kryetare shteti që t’i kthejë normalitetin njerëzor moral e institucional zyrës së Presidentit të Republikës. Nuk do bjerë nga qielli, me siguri do gjendet mes nesh këtu në territorin e Republikës se Shqipërisë, apo në territorin shpirtëror të kombit tonë se mund të jetë edhe jashtë Republikës së Shqipërisë. Por e kemi detyrim t’i japim asaj zyre mundësinë që për 5 vitet e ardhshme, të ketë një njeri normal”, deklaroi Rama.
