Presidenti Ilir Meta duket se i trembet një shpallje “non grata” pas Sali Berishës. Ai u pyet në “Çim Peka Live”, mbi zërat që qarkullojnë se do ketë një vendim kundër tij nga SHBA sapo të lërë Presidencën. Meta shpërtheu në sulme e kërcënime ndaj SHBA dhe ambasadores Yuri Kim, teksa paralajmëroi se do i përgjigjet kujtdo ashtu siç e meriton. Kreu i Shtetit tha se ai ndihet super grata, dhe se beson te demokracia. Sipas tij, kushdo që zgjedh kryeministrin Edi Rama apo kryedemokratin Lulzim Basha për t’i dhënë mesazhe të tilla, gabon rëndë. Po kështu ai ka shtuar sulmet ndaj liderit demokrat Lulzim Basha, duke mbështetur tentativat e Berishës për të marrë me dhunë PD.
“Nëse ka ndonjë palo ambasadë që ka zgjedhur ndonjë palo politikan për ti dhënë mesazhe Ilir Metës, ju them që Ilir Metën këtu do ta kenë. Kush ka ndonjë mesazh për Ilir Metën le t’ia thotë vetë, sepse do marrë përgjigjen që meriton. Kush zgjedh “Kryememexhiun” ose “Gruan e Bilalit” për ti dhënë mesazhe Ilir Metës, gabon shumë rëndë.
Kush ka një mesazh për Ilir Metën, le t’ia thojë direkt Ilir Metës dhe do marrë përgjigjen ashtu siç e meriton. Ilir Meta është këtu, është super grata dhe beson te demokracia, beson te liria dhe beson mbi të gjitha te Shqipëria.
Ilir Meta ka një atdhe dhe një axhendë. Ilir Meta nuk është naiv, nëse dikush do territorin tonë por përbuz popullin tonë, sot apo nesër ai do të jetë armiku ynë dhe Ilir Meta i del përballë që sot. Unë jam njeri që respektoj në radhë të parë ligjet e shtetit tim dhe pastaj ligjet e shteteve të tjera dhe le të dalë një shqiptar që thotë më gënjeu Ilir Meta. Të dalë një amerikan që të thotë më ka gënjyer Ilir Meta. Kjo është krenaria ime: Që une nuk kam gënjyer asnjë! Kur Ilir Meta ka dalur në lëvizjen e dhjetorit, nuk ka patur Ambasadë Amerikane në Tiranë, unë kam respekt për Ambasadën Amerikane”, tha Meta.
