Kreu i qeverisë Edi Rama i ka mohuar të gjitha akuzat e një bashkëpunimi të fshehtë me kryedemokratin, Lulzim Basha. Në konferencën për mediat ku ka diskutuar ngjarjet dhe vendimet më të rëndësishme të vitit 2021, Rama tha shkuar dhe qartë se është një gënjeshtër ajo çfarë është aluduar.
“Është një gënjeshtër fund e krye”, ka deklaruar Rama, teksa u pyet nga gazetarët në konferencën e fundvitit.
“Jemi në një kohë kur sipas meje, nuk kam bërë statistikë por sipas meje, dita prodhon më shumë gënjeshtra se të vërteta. Akuza merr dhenë, gjithë dynjaja fillon shan, ndërkohë makina është e dikujt tjetër. Akuzohem unë që paguhem 730 mijë euro në vit për fluturimet. Akuza merr dhenë, fillojnë sharjet. Gënjeshtër fund e krye. Gënjeshtër pa bravë fare. E keqja bën më shumë bujë. Dhe gënjeshtra gjen më shumë vesh. Kur gënjeshtra bën xhiron e botës, e vërteta nuk ka veshur pantallonat”, tha Rama.
Kryeministri Edi Rama ka theksuar se si Basha ashtu edhe Berisha janë dy anët e marrëzisë në PD, dhe nuk do të interesohet për asnjërin prej tyre.
“Basha është në dy anët e një marrëzie që po e çon PD drejt një fundit të merituar për shkak se është i përgatitur prej vitesh. Jo nga unë, as nga ne dhe ju, as nga shqiptarët që e besojnë dhe votojnë. Por pikërisht nga këto dy figura që janë shëmbëlltyra e gjithë asaj që është përgatitur me këmbënguljen e verbër në përsëritjen e një gjëje për të kërkuar rezultate. Një forcë politike që nuk ka prodhuar prej vitesh asnjë gjë, përveç mitesh fitoresh të vjedhura dhe sherre. Rrëmuja që kanë dëmtuar vendin. Përpjekje për tu kthyer në pushtet pa pasur kapacitet real për të qeverisur. Për mua është shumë e qartë. Nuk kam punë as me Bashën dhe as me Berishën. Në hallin e tyre e kanë kthyer në hallin e PD dhe në hallin e Shqipërisë, por nuk është e mundur. Nuk bëj parashikime dhe nuk do them çfarë sjell e ardhmja. Por siç janë gjërat, nuk kam asnjë arsye përpos dëshirë për tu marrë me ta. Edhe kohën nuk do ma marrin më. Nuk kam asnjë preferencë. Është një marrëzi e ndarë përgjysmë”, tha Rama.
