Policia e Fierit ka dalë me një sqarim në lidhje me një denoncim të kryetarit të PD-së në Fier, Luan Baçi. Ai akuzoi kryetarin e Bashkisë Fier dhe Policinë Bashkiake, se ka ndërprerë procesin e votimit në Njësinë Administrative Cakran. Blutë e Fierit kanë reaguar pas denoncimit në media të deputeti demokrat, Luan Baçi. Strukturat e Policisë së Shtetit sqarojnë me një deklaratë për mediat, se janë tërësisht të papërfshira dhe neutrale në këtë situatë. Ndër të tjera policia nënvizon se mbetet e angazhuar maksimalisht, për të garantuar rendin e sigurinë në territor.
“Në lidhje me nje lajm të publikuar ku aludohet se Policia ka ndërhyrë në një qendër votimi në Njësinë Administrative Cakran, Fier sqarojmë se:
Strukturat e Policisë së Shtetit janë tërësisht të papërfshira dhe neutrale në këtë situatë.
Policia e Shtetit mbetet e angazhuar maksimalisht të garantojë rendin e sigurinë në territor, të parandalojë dhe reagojë me profesionalizëm në çdo situatë që cënon rendin e sigurinë, jetën dhe pronën e qytetarëve.
Policia e Shtetit fton qytetarët të denoncojnë në nr. 112 apo Komisariatin Dixhital çdo paligjshmëri duke garantuar anonimat të plotë, reagim të mënjëhershëm e të paanashëm“, thuhet në reagimin e policisë.
