Deputeti Vangjel Dule kishte kërkuar një interpelancë me kreun e qeverisë Rama, për mbrojtjen e të drejtave të minoriteteve. Rama nuk ishte i pranishëm sot në Kuvend, dhe në mungesë të tij delegoi Ministren për Marrëdhëniet me Parlamentin, Elisa Spiropalin, që të zhvillonte interpelancën me Dulen. Deputeti Vangjel Dule tha se nuk e pranon interpelancën në mungesë të kryeministrit, dhe kërkoi që të zhvillohet në një moment të dytë. Ai shtoi më tej se qëndrimi i kryeministrit Rama, dëshmon se për të respektimi i të drejtave të minoriteteve nuk ekziston në agjendën e prioriteteve të tij.
“Njoftohem sot në mëngjes se kryeministri nuk ka denjuar të diskutojmë në lidhje me këto çështje dhe e ka deleguar. Ka dy mënyra se si mund ta trajtoj këtë. E para është mënyra cinike dhe kam të plotë mundësinë ta bëj, por jo dëshirën. E dyta është konstruktive, ashtu duhet të jemi të gjithë me vlerat dhe parimet e një sistemi të mirëqenë demokratik. Qëndrimi i sotëm i kryeministrit Rama dëshmon se për të, respektimi i të drejtave të minoriteteve nuk ekziston në agjendën e prioriteteve të tij. Mirëpo ekziston në agjendën e Bashkimit Europian. Me keqardhje nuk e pranoj zhvillimin e kësaj interepelance. Nëse ju keni mirëkuptimin, zhvendoseni vetë në një datë tjetër të përshtatshme për kryeministrin. Nëse nuk do ta bëni, atëherë do ta riparaqes kërkesën, por dijeni se ky është qëndrim abuziv”, u shpreh Vangjel Dule.
Ndonëse interpelanca nuk u zhvillua, një përgjigje erdhi nga ministrja Elisa Spiropali, e cila ishte autorizuar që të fliste në emër të kryeministrit.
Elisa Spiropali: Ne vendosëm që këtë interpelancë ta mbajmë sot, dhe ju vendosët që të mos ta zhvilloni, por kohën tuaj e konsumuar dhe thatë disa të pavërteta, duke thënë se qeveria nuk e ka prioritet respektin e pakicave kombëtare. Në vitin 2017 kemi kaluar një ligj që është nga më progresistet në rajon dhe më gjerë, është nga të paktat vende që e ka plotësuar këtë kuadër ligjor dhe me 8 VKM.
Vangjel Dule: Zonja Spiropali, sapo e provuat drejtësinë e vendimin tim për të mos e zhvilluar këtë interpelancë. Respektimi i të drejtave në një Parlament, është çështje debati dhe jo çështje recitimesh.
