PD mbetet e vendosur për të çuar përpara nismën e saj, për të futur në Vetting të gjithë politikanët. Demokratët kanë shtuar propozimet e tyre sa i takon Vettingut në politikë. Përmes një njoftimi të shpërndarë për mediat, PD bëri me dije se kryetari Lulzim Basha do të kërkojë të ndryshojë Kodin Penal, me qëllim që në kuadër të Vettingut në politikë, çdo politikan që është përfshirë në blerje votash, sipas saj, duhet të dënohet me 22 vite burg.
“Krahas Vettingut në politikë, me qëllim dhënien fund njëherë e mirë lidhjeve të botës së krimit me politikën, PD do të propozojë ndryshimin e Kodit Penal, në përputhje me Kodin Penal italian (n. 416 ter), duke ashpërsuar dënimet për këdo që kryen krime zgjedhore: Kushdo që pranon drejtpërdrejtë apo nëpërmjet ndërmjetësve, premtimin për të fituar vota nga elementë të krimit të organizuar, në shkëmbim të parave apo favoreve të tjera, dënohet me 15 vite burg.
I njëjti dënim parashikohet edhe për elementët e krimit të organizuar që kanë dhënë premtime të tilla, apo këdo tjetër që rezulton i përfshirë; Nëse politikani, i përfshirë në një skemë të tillë, zgjidhet, ai dënohet me 22 vite burg”, thuhet në njoftimin e PD, teksa citohet Basha.
