Britania u bë sot vendi i parë në botë që miratoi një pilulë antivirale, e cila mund të ndryshojë luftën ndaj COVID-19. Agjencia Rregullatore e Barnave dhe Produkteve të Kujdesit Shëndetësor (MHRA) rekomandoi që ilaçi, molnupiravir, të përdoret sa më shpejt që të jetë e mundur pas një testi pozitiv për COVID-19, dhe brenda pesë ditëve nga fillimi i simptomave.
Ky është trajtimi i parë antiviral oral për COVID-19 që miratohet, dhe vjen përpara lejes së mundshme rregullatore të SHBA. Këshilltarët amerikanë do të takohen këtë muaj, për të votuar nëse molnupiravir duhet të autorizohet.
Ilaçi që do të quhet Lagevrio në Britani, është vëzhguar nga afër që kur të dhënat muajin e kaluar treguan se mund të përgjysmojë shanset për të vdekur, ose për t’u shtruar në spital për ata që janë më të rrezikuar nga zhvillimi i rëndë i COVID-19, kur jepet në fillim të sëmundjes.
Qeveria britanike dhe Shërbimi Shëndetësor Kombëtar i vendit, do të konfirmojnë se si trajtimi do të vendoset për pacientët në kohën e duhur.
Burimi i lajmit: REUTERS. Përshtatur nga Tirana Today
