Ministri i Punëve të Brendshme të Serbisë, Aleksandar Vulin, ka ironizuar deklaratën e mëhershme të kryeministrit të Kosovës, Albin Kurti. Në kundërpërgjigje, ai thotë se Kurti ka thënë të vërtetën se “Aleksandar Vuçiç është problemi më i madh i Kosovës”.
“Kurti nuk sulmon Tadiçin, as ndonjë politikan tjetër që udhëhoqi Serbinë, por vetëm Aleksandar Vuçiçin”. Kjo sipas Vulin ka një arsye. “Kurti e di se ndërsa Aleksandar Vuçiç udhëheq Serbinë, Kosova nuk është dhe nuk do të jetë shtet”, ka thënë Vulin për HRT.
Delegacionet e Kosovës dhe Serbisë janë takuar dje në Bruksel, në kuadër të gjetjes së një zgjidhjeje, e cila do të çonte në normalizimin e situatës në veri të Kosovës. Pas takimeve të shumta bilaterale mes përfaqësuesit të Bashkimit Europian mbi dialogun, Miroslav Lajçak dhe përfaqësuesve të dy delegacioneve, zëvendës kryeministrit Besnik Bislimi nga pala kosovare dhe Petar Petkoviç nga pala serbe, është arritur një dakordim që duket se do të qetësojë tensionet në veri.
Bislimi ka bërë me dije se është arritur të ndërtohet një draft final, i cili pritet të miratohet edhe nga pala serbe, në mënyrë që të kthehet në një marrëveshje të finalizuar.
“Kemi pasur disa takime, të gjitha ishin bilaterale, me zotin Miroslav Lajçak, i cili pastaj ka ndërmjetësuar mes palëve. Qëllimi për ne ka qenë i qartë, të arrijmë deeskalimin e të ruajmë reciprocitetin me targa. Deri tash kemi arritur te një draft final, që thuajse është dakorduar në tërësi. Ka mbetur vetëm pala serbe të japë dakordim final. Kemi tentuar të detyrojmë Serbinë që ti largojë procedurat për qytetarët e Kosovës që të lëvizin drejt Serbisë. Dhe mendoj qe ky ka qenë rezultati i sot, mund të themi që është një marrëveshje”, është shprehur ai.
