Një tjetër rrjedhë ka marrë rasti i biznesmenit italian Davide Pecorelli, i cili dyshohej se u dogj brenda makinës së tij në Shqipëri. Ai është gjetur i gjallë në ishullin Elba në Toskana të Italisë, teksa ishte bllokuar në det, pasi motori i gomones ku ndodhej ishte prishur.
Biznesmeni kishte ndryshuar edhe pamjen e jashtme, në mënyrë që të mos identifikohej në Itali. Ai ka dhënë deklarimet në polici, e më pas u la i lirë, por nuk dihen ende arsyet përse ai inskenoi të gjithë ngjarjen.
Paraprakisht dyshohet se ai krijoi këtë skemë, për të fituar siguracionet. Nga Shqipëria ai u largua në mënyrë ilegale nga Hani i Hotit, për të shkuar më pas drejt Italisë, dhe në këtë skemë mashtrimi dyshohet se është ndihmuar edhe nga shqiptarë, kundrejt pagesës. Biznesmeni italian, që së fundmi jetonte si rumun, u gjet tetë muaj pasi la të shkrumbuar makinën e tij në Pukë.
Kujt i përkasin eshtrat e gjetura brenda mjetit “Skoda Fabia”?
Mbetjet kockore që u gjetën brenda makinës së biznesmenit 45-vjeçar, u nisën drejt Italisë më datë dhjetë shkurt të këtij viti. Mostra e eshtrave të gjetura do të krahasoheshin me ADN-në e të vëllait të biznesmenit, Antonello Pecorelli, por ende nuk ka një përgjigje për analizën e tyre. Duke qenë se Pecorelli i gjet gjallë në Itali, kujt i përkasin këto eshtra?/Tirana Today
