Pas 9 muajsh hetime që nga gjetja e makinës së tij të djegur në Pukë, ka marrë fund edhe misteri mbi zhdukjen në Shqipëri të biznesmenit italian Davide Pecorelli. Ai është gjetur në Itali, ndërsa kishte inskenuar çdo gjë, ndërsa policia kishte humbur gjurmët e tij.
Hetimet për mashtrim
Biznesmeni italian do të hetohet nga autoritetet shqiptare për mashtrim. Tashmë pritet të dërgohet një letër-porosi mes palëve, ose vetë 45-vjeçari do të udhëtojë drejt Shqipërisë për të dhënë sqarime.
Kockat në makinën e djegur, janë marrë nga një varrezë e vjetër
Kockat e gjetura në makinën e djegur të cilat u hetuan fillimisht si të Pecorellit, janë marrë nga një varrezë e vjetër për të bindur policinë dhe të afërmit se ai ka vdekur. Mbetjet e gjetura kockore, janë dërguar në Itali për t’u ekzaminuar.
Shkak borxhet?
Arratisja e tij dyshohet të jenë bërë për shkak të borxheve që kishte në Itali, ku disa nga bizneset e tij kishin falimentuar dhe synonte që përmes kësaj skeme të përfitonte siguracionet e jetës.
Vitet e fundit ai lëvizte mes Italisë dhe Shqipërisë, ku ishte lidhur me një grua shqiptare më të cilën kishte edhe një fëmijë. Ndërkohë mediat italiane bënë me dije mëngjesin e sotëm, se ai ka folur në telefon me ish-gruan pasi u gjet në brigjet e Livornos në një gomone, në anën e kundër të shtetit shqiptar prej ku kishte humbur gjurmët 9 muaj më parë.
Kjo duket të qenë pjesë e strategjisë së tij për t’u larguar prej hetuesve, të cilët prej kohësh po hetonin në disa pista për “vrasjen”.
Në fillim të këtij viti, makina që Pecorelli kishte marrë me qira në aeroportin e Tiranës, u gjet i shkrumbuar në Pukë dhe brenda automjetit u gjetën edhe mbetjet kockore të një personi, si dhe sende personale të biznesmenit italian. Ngjarja u dyshua si kriminale dhe hetimet u përqendruan te një vrasje e mundshme, ndonëse nuk rezultonte se Pecorelli të kishte patur konflikte me njeri.
Ai kishte biznese në Shqipëri ku tregtonte pajisje për sallone bukurie, dhe ishte në një periudhë delikate sa i përket të ardhurave, megjithatë nuk kishte informacione se ishte në borxh. Pecorelli ishte martuar me shqiptare, me të cilën kishte edhe një fëmijë. Në Shqipëri për të sqaruar misteret që rrethonin këtë ngjarje, erdhën edhe hetues italianë.
