Deteja të reja janë mësuar në lidhje me një mega-operacion të finalizuar nga policia shqiptare, spanjolle dhe gjermane në territorin e Spanjës, ku ranë në pranga 107 persona. Stefan Curri, me origjinë nga Puka, është bosi i grupit të narkotrafikut, nga i cili janë arrestuar tashmë 107 persona, gjatë një operacioni që përfshiu autoritetet e zbatimit të ligjit në Spanjë, Gjermani dhe Shqipëri.
Vetë Curri është arrestuar gjatë operacionit që u zhvillua më 13 korrik. Duke iu referuar hetimeve, Curri me lidhjet e tij rekrutonte ushtarë kryesisht nga zona e Pukës dhe Mirditës, ku u paguante avionin duke i ftuar si turist dhe ktheheshin në punëtorë e roje.
Policia shqiptare, spanjolle dhe ajo gjermane, në mbështetje dhe nga EUROPOL, u bënë bashkë për finalizimin e operacionit të koduar “DOBRA”, ku në pranga ranë 107 persona, pjesë e të cilëve janë edhe shumë shqiptarë.
Ky aksion i përbashkët ndërkombëtar u prezantua në një konferencë shtypi nga komisari i përgjithshëm i Policisë Gjyqësore të Policisë Kombëtare, Rafael Perez Perez, kreu i Divizionit të Hetimit Penal të Korpusit Mossos d’Esquadra, Ramon Chacón dhe drejtori i Përgjithshëm i Policisë Shqiptare, Ardi Veliu.
“Hetimi filloi në qershor të vitit të kaluar, pas marrjes dijeni për një rrjet kompleks lehtësuesish, të cilët dyshoheshin se po mbulonin një organizatë me origjinë shqiptare për t’u vendosur në Spanjë.
Ky rrjet ishte i përbërë nga profesionistë nga sektorët e pasurive të paluajtshme dhe të energjisë elektrike, ndër të tjera, të cilët, kundrejt pagesës paraprake, ndihmuan organizatën të vendoset në Spanjë, duke u siguruar atyre logjistikën dhe infrastrukturën e nevojshme për kultivimin e marijuanës.
Pas kryerjes së këtij kultivimi masiv, marijuana shpërndahej në vende të ndryshme në Europë, përfshirë Gjermaninë, ku vlera e drogës shumëfishohej me pesë”, thuhet në njoftimin e policisë spanjolle, të bërë publik edhe nga policia shqiptare.
