Me anë të statuseve në anglisht të përcjella në Twitter, për tu lexuar si brenda dhe jashtë Shqipërisë, Rama ka reaguar sërish për strehimin e afganëve në vendin tonë.
Ky reagim vjen si një kundërpërgjigje ndaj zërave që thonë se Shqipëria i pranoi afganët, vetëm se iu kërkua nga Shtetet e Bashkuara të Amerikës.
Kryeministri sqaron se Shqipëria po përmbush përgjegjësinë e saj si anëtare e NATO-s, dhe për shkak të asaj që ne përfaqësojmë si komb. Ai thotë më tej se ne i detyrohemi traditës sonë dhe të kaluarës sonë të afërt si refugjatë, dhe kujtimeve që do të trashëgojnë fëmijët tanë në të ardhmen.
“Është me të vërtetë shqetësuese të lexosh se se Shqipëria po strehon afganët vetëm se një gjë e tillë është kërkuar nga SHBA. Njëjtë siç është qesharake t’u kthesh atyre kurrizin dhe të fajësosh vetëm SHBA-në.
Ne ishim të gjithë si pjesë e NATO-s, dhe ata njerëz ishin në krahun tonë, sepse ata besonin në idealet mbi të cilat bazohet SHBA dhe BE.
Shqipëria po përmbush përgjegjësinë e saj si anëtare e NATO-s, dhe për shkak të asaj që ne përfaqësojmë si komb. Ne mund të mos jemi shumë të pasur, po ne u detyrohemi miqve tanë afganë të cilët kanë sot nevojë, ne i detyrohemi traditës sonë dhe të kaluarës sonë të afërt si refugjatë dhe kujtimeve që do të trashëgojnë fëmijët tanë në të ardhmen.
Të largohesh nga këto vlera, është njësoj si të largohesh nga më e mira jonë, nga historia dhe nga idealet demokratike që bota duhet të promovojë jo thjesht me fjalë dhe me vepra”, shkruan Rama në Twitter.
Shying away from these basic values is shying away from the best of ourselves, of our history and from the ideals that the democratic world is supposed to promote not just in words, but also in deeds. #SaveAfghanLives #SaveAfganWomen
— Edi Rama (@ediramaal) August 18, 2021
