Pas dy vajzave, sot ka ndërruar jetë edhe e ëma e tyre nga shpërthimi i bombolës së gazit brenda hotelit në Velipojë. Alketa Gjoka, 40-vjeç, nuk ka mundur t’u mbijetojë plagëve të marra, dhe ka ndërruar jetë në spital në Itali, ku ishte dërguar për mjekim më të specializuar. Ditë më parë, pas shpërthimit gjetën vdekjen vajza e saj e madhe Daniela Gjoka, 19-vjeçe dhe vajza e vogël Klarisa Gjoka, 15-vjeçe.
I vetmi i mbijetuar i kësaj familje është djali i mitur, Enrik Gjoka, 12-vjeç, i cili ndodhet në spital. Familja Gjoka jetonte në Itali, por ishin kthyer në Velipojë për të përgatitur hotelin me nisjen e sezonit turistik.
Tragjedia ndodhi mëngjesin e 4 korrikut, në hotelin 3 katësh në pronësi të kësaj familje. Në momentin kur ndodhi ngjarja, nuk ka pasur turistë në hotel.
Katër anëtarët e familjes qëndruan për disa ditë në spital në QSUT, dhe më pas u transportuan drejt Italisë për trajtim më të specializuar. Familja Gjoka po përgatiste mjediset e hotelit të tyre në Velipojë, për të pritur pushues gjatë sezonit të verës.
Kur ndodhi shpërthimi?
Katër anëtarë të familjes Gjoka mbetën të plagosur pas shpërthimit të bombolës së gazit në një hotel në Velipojë të Shkodrës. Shpërthimi ka ndodhur rreth orës 06:40.
Ka qenë Alketa Gjoka, 40-vjeçe që është zgjuar nga gjumi rreth orës 06:30, dhe ka shkuar të bëjë një kafe për veten dhe fëmijët. Në këtë moment, ka ndodhur shpërthimi.
Ata kanë përfunduar në repartin e djegieve të rënda në QSUT, me një masë prekje prej 85-90% e trupit, ndërsa dëshmitarët rrëfyen se trupat e tyre i gjetën në pishinë, ku kishin hyrë të lehtësonin dhimbjet.
