67,860 doza të vaksinës Pfizer kanë mbërritur mbrëmjen e sotme në aeroportin e Rinasit. Lajmin e ka bërë të ditur kryeministri Edi Rama përmes një postimi në rrjetin social, Facebook.
Sipas kreut të qeverisë, deri më tani në vendin tonë kanë mbërritur 1,679,410 vaksina kundër koronavirusit, teksa shtoi se kjo sasi e mbërritur sot, u sigurua nga financimi i qeverisë shqiptare përmes instrumentit Covax, nga kontrata direkte me kompaninë si dhe nga mbështetja e Bashkimit Europian.
”67,860 doza të vaksinës Pfizer sapo kanë mbërritur në Aeroportin “Nënë Tereza”, duke e çuar në 1,679,410 sasinë e vaksinave anticovid të mbërritura në vend. Kjo sasi e vaksinave Pfizer u sigurua nga financimi i qeverisë shqiptare përmes instrumentit Covax, nga kontrata direkte me kompaninë si dhe nga mbështetja e Bashkimit Europian. Vijojmë çdo ditë pa u ndalur me vaksinimin masiv në të gjithë vendin. Deri tani janë kryer 1,148,910 vaksinime.”, shkruan Rama në rrjetin social, Facebook.
Situata epidemiologjike në vendin tonë mbetet e qëndrueshme. Ministria e Shëndetësisë bën me dije se në 24 orët e fundit, janë regjistruar 16 raste të reja me Covid-19, nga 2.760 testime të kryera.
Të infektuarit kanë rezultuar në këto bashki: 4 raste në Elbasan, 3 në Tiranë, nga 2 raste në Lezhë, Kavajë, nga 1 rast në Durrës, Korçë, Kukës, Has, Lushnje.
Ndërkohë, fatmirësisht nuk është shënuar asnjë viktimë. Po në 24 orët e fundit janë shëruar edhe 13 pacientë, duke e çuar numrin e të shëruarve në 130,152 që nga fillimi i epidemisë. Në Spitalin Infektiv po marrin trajtim spitalor të specializuar 6 pacientë, teksa raste aktive mbeten 283.
Me hyrjen e variantit Delta në vend, autoritetet shëndetësore apelojnë qytetarët për respektimin e masave të distancimit fizik, vendosjen e maskave në ambientet e brendshme dhe higjenën, të cilat janë hjanë thelbësore për kufizimin e përhapjes së virusit.
Statistika (26 Korrik 2021)
Raste të reja ditore 16
Të shëruar në 24 orë 13
Të shtruar në spitale 11
Humbje jete në 24 orë 0
Testime ditore 2760
Testime totale 880,100
Raste pozitive 132,891
Raste të shëruara 130,152
Raste Aktive 283
Humbje jete 2,456
Shpërndarja gjeografike e rasteve aktive sipas qarqeve:
Tiranë 100
Elbasan 34
Kukës 31
Vlorë 26
Lezhë 25
Durrës 19
Shkodër 16
Fier 15
Berat 7
Korçë 7
Gjirokastër 3
